01.11.2026 | 21:56
Լրագրողներն այցելել են բանակային դիրք ու ամրացված շրջան, հանդիպել Սուրեն Պապիկյանի հետ
Ջեյք Սալիվանն ու Իբրահիմ Քալընը քննարկել են Հայաստանի ու Ադրբեջանի միջև խաղաղության բանակցությունները
Քաղաքականություն
03.10.2022 | 11:36
ԱՄՆ նախագահ Ջո Բայդենի Ազգային անվտանգության հարցերով խորհրդական Ջեյք Սալիվանը նախօրեին Ստամբուլում հանդիպել է Թուրքիայի նախագահ Ռեջեփ Թայիփ Էրդողանի մամուլի խոսնակ, գլխավոր խորհրդական Իբրահիմ Քալընի հետ, հայտնում է Սպիտակ տունը։
Նշվում է, որ կողմերը քննարկել են իրենց շարունակական աջակցությունն Ուկրաինային Ռուսաստանի ագրեսիայի դեմ պայքարում՝ նաև դատապարտելով Ռուսաստանի կողմից ուկրաինական տարածքի անօրինական բռնակցման փորձը:
Սալիվանն իր երախտագիտությունն է հայտնել Թուրքիայի ջանքերի համար՝ բարելավելու պարենային գլոբալ անվտանգությունը՝ նպաստելով ուկրաինական հացահատիկի արտահանմանը և դիվանագիտական աշխատանքին՝ ապահովելու ուկրաինացի ռազմագերիների, ինչպես նաև ՌԴ-ի կողմից պահվող երկու ամերիկացի քաղաքացիների ազատ արձակումը:
«Նրանք նաև քննարկել են տարածաշրջանային անվտանգության հարցեր, այդ թվում՝ իրենց աջակցությունը Հայաստանի ու Ադրբեջանի միջև խաղաղության բանակցություններին։ Ընդգծվել է Արևելյան Միջերկրականում տարաձայնությունների լուծման համար երկխոսության ու դիվանագիտության կարևորությունը և Շվեդիայի ու Ֆինլանդիայի ՆԱՏՕ-ին անդամակցության առաջընթացը»,-ասվում է Սպիտակ տան հաղորդագրության մեջ։
Էմմա Չոբանյան
