ԵՐԵՎԱՆԻ ԺԱՄԱՆԱԿՈՎ․ Ռուսաստանի անկումը մեր ժողովուրդը շատ ավելի ծանր է տանում, քան Ռուսաստանի ժողովուրդը. Եղիշե Պետրոսյան․ ՏԵՍԱՆՅՈՒԹ

«Դավիթը կհաղթի Գողիաթին, եթե մեջքներս ուղղենք ու կամք դրսևորենք, եթե քաջ գիտակցենք`ով կարող է թիկունքից հարվածել և ում վրա չարժե ընդհանրապես հույս դնել: Մեր փրկությունը մեր վարքի, մեր կամքի մեջ է»,-Factor TV-ի հետ զրույցում նման տեսակետ է հայտնում երաժիշտ, երգահան Եղիշե Պետրոսյանը` անդրադառնալով ֆրանսիացի դերասանուհի Արիան Ասկարիդի այն խոսքերին, թե հայերը Դավթի նման կռվում են Գողիաթի դեմ:

Եղիշե Պետրոսյանն անդրադառնում է Հայաստանի առջև ծառացած մի շարք արտաքին և ներքին մարտահրավերների. «Արևմուտքը ստիպողաբար փորձում է հանել մեր իշխանություններին ՀԱՊԿ կոչվող ճահճից: Այս պարագայում իշխանություններն այլևս նախկինների անունը տալու շանս չունեն: Եթե նախկինում դրանով էին պաշտպանվում, հիմա մենք պետք է ուշադիր հետևենք իրենց քայլերին և տեսնենք` ինչ են անում»: Երգահանի խոսքով` այն պարագայում, երբ Ռուսաստանը դուրս է եկել ամբողջ քաղաքակիրթ աշխարհի դեմ, Հայաստանում շատերը շարունակում են հույսեր կապել այդ երկրի հետ. «Ռուսաստանի անկումը, ինչի ականատեսն ենք այսօր, մեր ժողովուրդը շատ ավելի ծանր է տանում, քան Ռուսաստանի ժողովուրդը»: Եղիշե Պետրոսյանը շեշտում է` մենք վերջին երկու տարում չկարողացանք դասեր քաղել և խուսափել հասարակության բևեռվածությունից: Ինչ վերաբերում է երկրում առկա հանրային դիսկուրսի որակին, մեր զրուցակիցը նկատում է. «Ինտելեկտուալ բովանդակությունը չի կարող անգամ մրցակցել հայհոյախառն կոնտենտի հետ, որ տարածվում է այսօր»:

Երգահանը խոսում է նաև երկրի համար վճռորոշ այս պահին մտավորականության դերի մասին և ընդգծում` մենք կա´մ չունենք մտավորականներ, կա´մ նրանք իրենց տեղում չեն. «Ես ճանաչում եմ առանձին անհատների, որոնց հարգում եմ, մնացածը մի մեծ հարմարվողական զանգված է»:

Մանրամասները` տեսանյութում:

Աննա Բաբաջանյան