«Հրաժարակա՛ն», «Ո՛չ բռնապետությանը»․ Բաքվում ոստիկանները ձերբակալել են ընդդիմության հավաքի մասնակիցներին․ ԼՈՒՍԱՆԿԱՐՆԵՐ

Ադրբեջանի Միլի Մեջլիսի մոտ այսօր բողոքի ակցիա է տեղի ունեցել, որը կազմակերպել էր ընդդիմադիր «Ժողովրդական ճակատ» կուսակցությունը։ Ցուցարարները բողոքել են կուսակցությունների մասին նոր օրենքի դեմ։

Տեղական լրատվամիջոցների հաղորդմամբ՝ ոստիկաններն ակցիայի մեկնարկից անմիջապես հետո անցել են գործի և ուժի կիրառմամբ ձերբակալել դրա մասնակիցներին։

Հավաքվածները վանկարկել են «Ազատ ընտրություններ», «Հրաժարակա՛ն», «Ո՛չ բռնապետությանը», «Չեղարկե՛ք օրինագիծը», «Ազատություն քաղբանտարկյալներին» և այլն։ Ոստիկանները սկսել են բերման ենթարկել ցույցի մասնակիցներին։ Ըստ լրագրողների՝ մոտ 40 մարդ է ձերբակալվել։

Բացի այդ, ոստիկանները կին ակտիվիստներ Սևինջ Սադիգովային ու Գյուլմիրա Ասլանովին դուրս են տարել Բաքվից ու այնտեղ ազատ արձակել։

Ձերբակալված անձանց թվի մասին պաշտոնական տեղեկություններ չկան։

Հավելենք, որ վաղ առավոտից ոստիկանությունը տներից սկսել էր ձերբակալել ընդդիմադիր գործիչներին ու հավաքի կազմակերպիչներին։ Մասնավորապես, ձերբակալվել են «Մուսավաթ» կուսակցության անդամ Թոգիգ Յագուբլուն, «Ժողովրդական ճակատ» կուսակցության փոխնախագահ Սեյմուր Հազիին, նախագահության անդամ Բախտիյար Իմանովին, կուսակցական ակտիվիստներ Մեհամադ Իմանլիին, Մուշվիգ Իմանգուլիևին, Ռովշան Գուլիևին և այլ գործիչներ։

Հավելենք, որ «Կուսակցությունների գործունեության մասին» օրենքի նոր նախագիծը խիստ սահմանափակում է քաղաքական գործունեությունը և ուժեղացնում իշխանությունների վերահսկողությունը քաղաքական կուսակցությունների նկատմամբ։

Էմմա Չոբանյան