Առաջարկում ենք թույլատրել քաղաքացիներին ակոսափող հրազենի փամփուշտների լիցքավորումը. Վիլեն Գաբրիելյան․ ՏԵՍԱՆՅՈՒԹ

ԱԺ Պաշտպանության և անվտանգության հարցերի մշտական հանձնաժողովի նիստում այսօր երկրորդ ընթերցմամբ քննարկվում է ՔՊ պատգամավորներ Վիլեն Գաբրիելյանի, Արմեն Խաչատրյանի և Անդրանիկ Քոչարյանի հեղինակած՝ «Զենքի շրջանառության կարգավորման մասին» օրենքի նախագիծը։

Վիլեն Գաբրիելյանի խոսքով՝ օերնքի առաջին ընթերցումից հետո գրավոր առաջարկներ չեն եղել, սակայն տեղի են ունեցել մի շարք աշխատանքային քննարկումներ և նախագծում կատարվել են որոշ տեխնիկական և բովանդակային փոփոխություններ։

«Բովանդակային փոփոխություննեում մի կարևոր կետ կա, այդ կետը վերաբերում է ակոսափող հրազենի փամփուշտների լիցքավորմանը։ Մենք առաջարկում ենք թույլատրել քաղաքացիներին ակոսափող հրազենի փամփուշտների լիցքավորումը կառավարության կողմից հատուկ սահմանված կարգով, ոստիկանության մեր գործընկերներն այս պահի դրությամբ որոշակի ռիսկ են տեսնում, գտել ենք կոմպրոմիսային տարբերակ»,- նշեց Գաբրիելյանը։

Նշենք, որ «Զենքի շրջանառության կարգավորման մասին» օրենքի նախագիծը, որով սահմանվում են քաղաքացիական, ծառայողական զենքի ներկրման, կրման թույլտվության, լիցենզիա տալու, արտոնագրից զրկելու հարցերը, զենքի շրջանառության սահմանափակումները, խստացվում է ապօրինի զենքի համար պատասխանատվությունը:

Ըստ հեղինակների, այս նախագծով բարձրացնում են հասարակության պաշտպանվածությունը․ նախագիծը կարգավորում է ՀՀ-ում զենքի և ռազմամթերքի շրջանառությունը, նպաստում է որսորդության, սիրողական և սպորտային հրաձգության, ինչպես նաև ռազմամարզության զարգացմանը․ ներդրվում է զենքի հետ վարվելու մշակույթը, որն ուղղված կլինի քաղաքացիների մարտունակության բարձրացմանը:

Մանրամասները՝ տեսանյութում։