Եվրոպացի հետախույզները ռուսական սուզանավեր են նկատել «Հյուսիսային հոսքի» վնասված խողովակաշարի հատվածում․ CNN

Արևմտյան հետախուզության աշխատակիցները պնդում են, որ անցած երկուշաբթի և երեքշաբթի ռուսական ռազմանավեր և սուզանավեր են նկատել «Հյուսիսային հոսք» գազատարի այն հատվածում, որտեղ դիվերսիա է իրականացվել, հաղորդում է CNN-ը։

Փորձագետները համոզված են, որ անջատված, բայց գազով լցված խողովակաշարը շարքից դուրս է եկել մի շարք պայթյունների հետևանքով, ինչը հանգեցրել է գազի արտահոսքի։ Դա տեղի է ունեցել երկուշաբթի Դանիայի և Շվեդիայի ափերի մոտ՝ խողովակի երեք ճյուղերի վրա, իսկ չորեքշաբթի երեկոյան Շվեդիայի առափնյա պահպանությունը չորրորդ արտահոսքն է հայտնաբերել:

Աղբյուրները, որոնք հայտնել են այդ տարածքում ռուսական նավատորմի ներկայության մասին, ընդգծում են, որ դա չի ապացուցում Ռուսաստանի մասնակցությունը դիվերսիաներին։ Սակայն այս վարկածը, ի թիվս այլոց, անպայման կդիտարկվի քննչական խմբի կողմից։

Դանիայի ռազմական ոլորտի ներկայացուցիչներից մեկն ասել է նաև, որ ռուսական նավերը կանոնավոր կերպով նավարկում են նշված տարածքում, և նրանց մասնակցությունը դիվերսիային ակնհայտ չէ։

«Մենք նրանց տեսնում ենք ամեն շաբաթ: Վերջին տարիներին Ռուսաստանի ակտիվությունը Բալթիկ ծովում մեծացել է: Նրանք հաճախ ստուգում են մեր պատրաստվածությունը ինչպես ծովում, այնպես էլ օդում»,- դանիացի զինվորականների խոսքերն է մեջբերում CNN-ը:

Միևնույն ժամանակ, շատ արևմտյան փորձագետներ համակարծիք են, որ Ռուսաստանն ուներ գազատարը վնասելու և՛ շարժառիթ, և՛ հնարավորություն, իսկ վթարի վայրի անմիջական մերձակայքում ռուսական սուզանավերի ներկայության մասին հաղորդումները միայն մեծացնում են կասկածները:

Բացի այդ, ըստ CNN-ի, ԱՄՆ-ին կասկածելի է թվում Ռուսաստանի կոչը՝ անհապաղ ՄԱԿ-ի Անվտանգության խորհրդի նիստ հրավիրել՝ կապված «Հյուսիսային հոսքի» շուրջ ստեղծված իրավիճակի հետ։ Ըստ ամերիկյան կողմի՝ Ռուսաստանն այդքան արագ է գործում միայն այն դեպքում, եթե մանևրը (ՄԱԿ-ի Անվտանգության խորհրդի գումարումը) նախապես ծրագրված է լինում։

Տաթև Ֆռանգյան