Սաակաշվիլիի կուսակցությունը պահանջում է ՌԴ քաղաքացիների համար «օկուպացիոն հարկ» սահմանել

Վրաստանի ընդդիմադիր «Միացյալ ազգային շարժում» կուսակցությունը, որը հիմնադրվել է 2001 թվականին Միխեիլ Սաակաշվիլիի կողմից, պաշտոնապես խորհրդարանին է ներկայացրել Աբխազիայի և Հարավային Օսիայի օկուպացիայի համար հարկման մասին օրենքի նախագիծը, գրում է svoboda.org-ը։

Ըստ օրինագծի նախաձեռնողների՝ ՌԴ բոլոր քաղաքացիները, ովքեր երկիր են գալիս կամ արդեն Վրաստանում են որպես զբոսաշրջիկներ, պարտավոր են պետական բյուջե վճարել 1000 լարի (մոտ 350 դոլար): Հակառակ դեպքում, ՌԴ քաղաքացին չի կարողանա հատել սահմանը, այդ թվում՝ ռուս-վրացական սահմանի ցամաքային հատվածում գտնվող Վերին Լարս-Կազբեգի անցակետով։ Եթե նա արդեն երկրում է, նրան կարող են արտաքսել, թեև Վրաստանի օրենսդրությունը նախատեսում է մեկ տարի առանց վիզայի ռեժիմ զբոսաշրջիկների համար, այդ թվում՝ Ռուսաստանից:

Իշխող «Վրացական երազանք» կուսակցության աղբյուրները դեռևս չեն մեկնաբանել օրինագիծը, սակայն ակնարկում են, որ այն դժվար թե ընդունվի։ Իրակլի Ղարիբաշվիլիի կառավարությունը հաճախ մատնանշում է երկնիշ տնտեսական աճը և չի թաքցնում, որ այդ աճը մեծապես պայմանավորված է Ռուսաստանից զբոսաշրջիկների մեծ հոսքով։

Բացի այդ, վարչապետ Ղարիբաշվիլին բազմիցս ընդգծել է Թբիլիսիի քաղաքականության էությունը ուկրաինական պատերազմի համատեքստում. «Վրաստանը չի միանա հակառուսական պատժամիջոցներին և թույլ չի տա Ռուսաստանի դեմ երկրորդ ճակատի բացումը»։

Միաժամանակ, Վրաստանը պարտավորվել է թույլ չտալ խտրականության որևէ ձև, իսկ առաջարկվող օրինագծում մի շարք իրավապաշտպան հասարակական կազմակերպություններ տեսնում են խտրականության նշաններ:

Տաթև Ֆռանգյան