23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Նման քայլի հետևանքները սարսափելի կլինեն․ Բլինքենը՝ ՌԴ-ի կողմից միջուկային զենքի կիրառման սպառնալիքների մասին
Քաղաքականություն
26.09.2022 | 11:33
ԱՄՆ պետքարտուղար Էնթոնի Բլինքենը Վլադիմիր Պուտինի միջուկային հռետորաբանությունն անվանել է «անպատասխանատու»։
Ամերիկյան CBS հեռուստառադիոընկերությանը տված հարցազրույցում Բլինքենն ասել է, որ Ռուսաստանի կողմից միջուկային զենք կիրառման դեպքում ԱՄՆ-ը ունի գործողությունների ծրագիր։ Պետքարտուղարը չի նշել, թե ինչ կոնկրետ միջոցների մասին է խոսքը։
Հարցին՝ արդյո՞ք ԱՄՆ-ը ուղիղ կապ է հաստատել Կրեմլի հետ միջուկային պատերազմի սպառնալիքի հետ կապված, Բլինքենը դրական է պատասխանել. «Այո՛, շատ կարևոր է, որ Մոսկվան մեզանից լսի և մեզանից իմանա, որ նման քայլի հետևանքները սարսափելի կլինեն: Եվ մենք դա շատ պարզ հասկացնել ենք տվել»:
Ըստ Բլինքենի՝ Ուկրաինայում սանձազերծած պատերազմում Պուտինն արդեն ձախողվել է.
«Նա ի սկզբանե շատ պարզ ասաց, որ իր նպատակն է ջնջել Ուկրաինայի ինքնությունը՝ որպես անկախ երկիր։ Այդ նպատակն արդեն ձախողվել է։ Ուկրաինացիները պայքարում են իրենց հողի համար։ Նրանք պայքարում են իրենց երկրի համար։ Ռուսները՝ ոչ։ Ռուս զինվորականները, որոնց նետում են այդ հակամարտության մեջ, հաճախ չգիտեն՝ ուր են գնում և ինչու են գնում։ Դա այն չէ, ինչի համար նրանք ցանկանում են պայքարել։ Ուկրաինացիները պայքարում են իրենց ապագայի համար։ Նրանք պայքարում են իրենց հողի համար։ Նրանք պայքարում են իրենց կյանքի համար»,- հավելել է Բլինքենը։
Տաթև Ֆռանգյան
