Ի՞նչ կարիքներ ունի բանակը. առաջնագծի համար վրան կարողները կամավորների են հավաքագրում. ՏԵՍԱՆՅՈՒԹ

Մանկավարժը, մոդելավորողը, իրավաբանը, նկարչուհին և տնային տնտեսուհին, ուժերը մեկտեղած, աշխատում են։ Կամավոր են եկել՝ սահմանին կանգնած զինվորների համար վրաններ պետք է կարեն։ Մեզ հետ շփվելու երկար ժամանակ չունեն։

Սրբուհին մանկավարժ է, հիմա չի աշխատում։ Երեխաներին դպրոց է տարել, ուսուցչին խնդրել՝ երեխաներին երկար պահել, մինչև ինքը տուն կհասնի։

Կամավորներից մեկն էլ Սիսիանից է եկել, լսել է, որ կամավորների կարիք կա, թողել է գործերն ու Երևան շտապել։

Վրանների ու քողարկող միջոցների արտադրության համար պարբերաբար կամավորների անհրաժեշտություն է լինում, այդ մասին Էրիկ Սարգսյանը ֆեյսբուքյան իր էջում է գրառում արել։ «Շանի» հասարակական կազմակերությունը դեռ 44-օրյա պատերազմի օրերին էր սկսել քողարկող միջոցներ, վրաններ ու ռազմական այլ անհրաժեշտ պարագաներ արտադրել, այս պահին, ասում է, վրանների անհրաժեշտությունն է մեծ։

Ամռանը արտադրության ծավալները մեծ չեն եղել, ռեսուրսներ էլ շատ չունեն։ Նախկինում 1 վրանը 5-7 օրում էին արտադրում, հիմա փորձում են 2 օրում դա անել։ Մետաղական կոնստրուկցիաների հետ աշխատանքն է ժամանակը երկարացնում։ Հիմա ամենից շատ ֆինանսական միջոցների ու կամավորների ներգրավման կարիք ունեն։

Ձեռնարկությունը հասարակական հիմունքներով է աշխատում, հիմնականում անհատական ֆինանսական աջակցության և ֆեյսբուքյան օգտատերերի ակտիվության շնորհիվ։ Օրինակ՝ վերջին գրառումից հետո, թե կտորից պարկեր են պետք, բավականաչափ քանակ հավաքվել է, հիմա կամավորներ են պետք՝ կարելու համար։

Էրիկ Սարգսյանը հիմա Պաշտպանության նախարարության հետ է համագործակցում, արտադրում են այն, ինչի կարիքն իսկապես կա։ Իսկ առհասարակ, ասում է, համակարգվածության լուրջ խնդիր կա։

Հակառակ դեպքում թե՛ ռեսուրսն է անիմաստ վատնվում, թե արդյունավետությունն է նվազում, դիրքերից մեկում ավելցուկ է լինում, մյուսում՝ խիստ կարիք։ Էրիկ Սարգսյանն ինքն էլ հնարավոր ամենահարմար առիթով բոլորին կոչ է անում համագործակցել պաշտպանական գերատեսչության հետ։

Մանրամասները՝ տեսանյութում։

Սաթենիկ Հայրապետյան