Էրդողանը հայտարարել է, որ Թուրքիան ցանկանում է ավելացնել ԱՄՆ-ից գազի գնման ծավալները՝ Եվրոպա մատակարարելու համար

Թուրքիան ձգտում է ավելացնել ԱՄՆ-ից գազի գնումները և մատակարարել որոշ հարևանների, քանի որ Եվրոպան բախվում է էներգետիկ ճգնաժամի, որն առաջացրել է Ուկրաինա Ռուսաստանի ներխուժման պատճառով։ Այս մասին հայտարարել է Թուրքիայի նախագահ Ռեջեփ Թայիփ Էրդողանը, գրում է Bloomberg-ը։

«Մենք ցանկանում ենք ավելացնել գազի գնման ծավալները ԱՄՆ-ից ավելի շահավետ պայմաններով։ Մենք պատրաստ ենք համակարգել ԱՄՆ հեղուկ գազի մատակարարումները տարածաշրջանի երկրներ»,- ասել է Էրդողանը Նյու Յորքում ամերիկյան բիզնեսի մի խումբ ներկայացուցիչների հետ հանդիպմանը։

Հրապարակման համաձայն՝ Թուրքիան և ԱՄՆ-ն ուղիներ են փնտրում՝ կարգավորելու հարաբերությունները, որոնք լարվել են վերջին տարիներին մի շարք վեճերի, այդ թվում՝ ռուսական ՀՕՊ համակարգերի գնման պատճառով։

Էրդողանն այժմ մատնանշում է էներգետիկ կապերի ընդլայնման ներուժը, սակայն Թուրքիան սահմանափակ կարողություններ ունի դեպի Եվրոպա գազ արտահանելու համար։ Այն տարանցիկ երկիր է ադրբեջանական գազի փոխադրումների համար Անդրանատոլիական գազատարով, որն անցնում է Հունաստանով և միանում մեկ այլ խողովակաշարի՝ Իտալիա հասնելու համար:

2022 թվականի առաջին եռամսյակում ԱՄՆ-ը դարձել է Թուրքիա հեղուկ գազի ամենամեծ մատակարարը։ Թուրքիան տարեկան ներկրում է շուրջ 60 միլիարդ խորանարդ մետր բնական գազ։

Էրդողանը նաև հորդորել է Վաշինգտոնին՝ չեղարկել թուրքական պողպատի և ալյումինի հավելյալ մաքսատուրքերը, որոնք Թրամփի վարչակազմն էր սահմանել, ինչպես նաև վերացնել զենքի վաճառքի խոչընդոտները: Նա նշել է, որ զենքի վաճառքի սահմանափակումները բացասաբար են ազդում ՆԱՏՕ-ի անվտանգության, ինչպես նաև առևտրային հարաբերությունների վրա։

Էմմա Չոբանյան