18.08.2026 | 22:17
Հայաստանի մի շարք հասցեներում էլեկտրաէներգիայի անջատումներ կլինեն
Հարձակվելով Ուկրաինայի վրա՝ ՌԴ-ն անամոթաբար խախտել է ՄԱԿ-ի կանոնադրությունը․ Բայդեն
Քաղաքականություն
22.09.2022 | 11:28
ԱՄՆ նախագահ Ջո Բայդենը Ռուսաստանին մեղադրել է ՄԱԿ-ին անդամակցության հիմնական սկզբունքները խախտելու մեջ։
«ՄԱԿ-ի Անվտանգության խորհրդի մշտական անդամը ներխուժել է հարևան երկիր, փորձել ջնջել ինքնիշխան պետությունը քարտեզից: Ռուսաստանը անամոթաբար խախտել է ՄԱԿ-ի կանոնադրության հիմնական դրույթները»,- ասել է Բայդենը ՄԱԿ-ի Գլխավոր ասամբլեայի 77-րդ նստաշրջանում իր ելույթի ժամանակ։
Նա միջուկային զենք կիրառելու Մոսկվայի սպառնալիքները «անպատասխանատու» է անվանել։ «Միջուկային պատերազմում հնարավոր չէ հաղթել և երբեք չպետք այն վարել», – ասել է Բայդենը՝ նշելով, որ ոչ ոք չի սպառնացել Ռուսաստանին՝ չնայած Պուտինի պնդումներին։ Նա նաև խոսել է Ուկրաինային Միացյալ Նահանգների կողմից աջակցության շարունակականության մասին։
«Պուտինը պնդում է, որ ստիպված է եղել գործել, քանի որ Ռուսաստանը սպառնալիքի տակ է եղել, բայց Ռուսաստանին ոչ ոք չի սպառնացել, և ոչ ոք, բացի Ռուսաստանից, չի ձգտել բախման: Մենք նույնիսկ զգուշացրել էինք, որ [ներխուժումը] մոտենում է, և ձեզանից շատերի հետ փորձեցինք կանխել այն»,- հայտարարել է Բայդենը։
«ԱՄՆ-ն ավելի քան 25 միլիարդ դոլար է ծախսել Ուկրաինային աջակցելու համար։ Եվ մենք աշխատում ենք դաշնակիցների և գործընկերների հետ՝ ապահովելու, որ Ռուսաստանը վճարի վայրագությունների և ռազմական հանցագործությունների համար: Որովհետև եթե պետությունները կարողանան իրականացնել իրենց կայսերական նկրտումներն առանց հետևանքների, մենք կվտանգենք այն ամենը, ինչ դրվել է ՄԱԿ-ի հիմքում: Ամենը»,- հայտարարել է Բայդենը։
Տաթև Ֆռանգյան
