Բալթյան երկրների ԱԳ նախարարներն արձագանքել են Ռուսաստանում մասնակի մոբիլիզացիային

Լատվիայի և Էստոնիայի ԱԳ նախարարներն արձագանքել են ՌԴ նախագահ Վլադիմիր Պուտինի՝ մասնակի մոբիլիզացիայի և միջուկային զենքի կիրառման սպառնալիքի հայտարարությանը։ Նրանք համապատասխան հայտարարությունները հրապարակել են Twitter-ի իրենց օգտահաշիվներում։

Լատվիայի արտգործնախարար Էդգարս Ռինկևիչսը վստահեցրել է, որ Լատվիան և ամբողջ Եվրոպան կաջակցեն Ուկրաինային, գրում է Korrespondent-ը։

«Մենք չպետք է ենթարկվենք շանտաժին և պետք է հնարավորինս աջակցենք Ուկրաինային: Ռուսաստանը հիմա Եվրոպայում և ամբողջ աշխարհում խաղաղության համար նույն սպառնալիքն է, ինչ նացիստական Գերմանիան՝ անցյալ դարում»,- պատասխանել է նա:

Պաշտոնյան նաև հավելել է, որ Լատվիան, անվտանգության նկատառումներից ելնելով, հումանիտար վիզաներ չի տրամադրի բռնի մոբիլիզացիայից փախած ռուսներին։

Էստոնիայի արտգործնախարար Ուրմաս Ռեյնսալուն էլ կարծում է, որ Կրեմլի ղեկավարի արարքը «խուճապային է և հիմարություն»։

«Հետևաբար, ավելի շատ մարդ և զինտեխնիկա կնետվի Ուկրաինայի դեմ ցեղասպանական պատերազմի մեջ: Սա հուսահատ, խուճապային և հիմար քայլ է: Էստոնիան և Եվրոպան կաջակցեն Ուկրաինային»,- հայտարարել է նա:

Լիտվայի արտաքին գործերի նախարար Գաբրիելիուս Լանդսբերգիսը դեռևս չի մեկնաբանել Պուտինի վերջին հայտարարությունները, սակայն մինչ այդ նա արձագանքել է Ուկրաինայի օկուպացված տարածքներում «հանրաքվեներին» ու դրանցից հետո այդ տարածքները բռնակցելու՝ Կրեմլի մտադրություններին։

Մեծ Բրիտանիայի պաշտպանության նախարար Բեն Ուոլեսն էլ կարծում է, որ մոբիլիզացիա չհայտարարելու մասին նախկին խոստումը դրժելը Ուկրաինայում Ռուսաստանի ներխուժման ձախողման ընդունում է։

Տաթև Ֆռանգյան