«Եռաբլուրում» Ոստիկանության ծառայողների գործողություններն ուսումնասիրվում են․ ՀՀ ոստիկանություն

Սեպտեմբերի 21-ին ոստիկանության ծառայողները Եռաբլուրի զինվորական պանթեոնում կազմակերպված միջոցառումների ժամանակ իրականացրել են իրենց գործառութային պարտականությունները, ինչի ընթացքում տարածքից ոստիկանություն են բերվել քաղաքացիներ. տեղեկացնում են ՀՀ ոստիկանությունից։

«Ոստիկանության պետի հանձնարարությամբ այդ գործողություններն ուսումնասիրվում են, և հանրությունը կիրազեկվի արդյունքների մասին:

Հորդորում ենք միջադեպը չօգտագործել քաղաքական նպատակներով ու նկատառումներով:
Չմոռանանք, որ ոստիկանությունը առաջին իսկ օրվանից մասնակիցն է մեր ազատության և անկախության համար մղվող պայքարի, և Եռաբլուրը նույնպիսի սրբավայր է նաև ոստիկանության ծառայողների համար. այնտեղ ննջում են Հայրենիքին իրենց կյանքը զոհաբերած նրանց տասնյակ ծառայակիցներ: Եվ զավակ կորցրած բոլոր ծնողների վիշտն էլ յուրաքանչյուր ոստիկան վերապրում է նույն ցավով, որ կրել ու կրում է իր զոհված ընկերների ծնողների հետ:

Եռաբլուրը բոլորիս սրբատեղին է և բոլորինս են չնվազող ցավն ու խորին խոնարհումը մեր հերոսների պայծառ հիշատակի առաջ»,- ասված է հաղորդագրությունում։

Հիշեցնենք, որ այսօր՝ սեպտեմբերի 21-ին՝ ՀՀ անկախության 31-րդ տարեդարձի օրը, ոստիկանական մեծ ուժեր էին կենտրոնացվել «Եռաբլուր» զինվորական պանթեոնում: Կարմիր ու սև բերետավորները քաշքշելով, բիրտ ուժ կիրառելով բերման ենթարկեցին զոհված զինծառայողների ծնողներին։ Նրանք պահանջում էին, որ Անկախության օրվա տոնի կապակցությամբ Նիկոլ Փաշինյանը չայցելի Եռաբլուր` ծաղիկներ խոնարհելու իրենց որդիների շիրիմներին։