17.12.2025 | 14:50
Նոտարական գործարքներ՝ թվային միջավայրում․ ինչ փոփոխություններ են սպասվում Կադաստրի կոմիտեում․ ՏԵՍԱՆՅՈՒԹ
Ռուսաստանում կոչ են անում բողոքի ցույցերի դուրս գալ՝ ընդդեմ մոբիլիզացիայի
Քաղաքականություն
21.09.2022 | 15:14
«Վեսնա» երիտասարդական շարժումը կոչ է անում ռուսաստանցիներին բողոքի ցույցերի դուրս գալ ՌԴ նախագահ Վլադիմիր Պուտինի կողմից հայտարարված մասնակի մոբիլիզացիայի դեմ, գրում է DW-ի ռուսական ծառայությունը։
«Հազարավոր ռուս տղամարդիկ՝ մեր հայրերը, եղբայրներն ու ամուսինները, նետվելու են պատերազմի մսաղացի մեջ։ Ինչո՞ւ նրանք պետք է մահանան, ինչո՞ւ մայրերն ու երեխաները պետք է արցունք թափեն։ Պուտինի դղյակի համա՞ր»,- սոցցանցերում գրել են ակտվիստները։
Նրանք նշել են, որ մոբիլիզացիայի հայտարարումից հետո «պատերազմն իսկապես գալու է բոլոր ընտանիքների տներ», և ռուսները պետք է մահանան, որ ուղղեն պուտինյան ռեժիմի սխալները, որը Ռուսաստանը ներքաշել է հրեշավոր կոտորածի, մեկուսացման ու աղքատության մեջ։
«Պատգամավորներն ու պաշտոնատար անձինք, որոնք ամեն օր բղավում էին մոբիլիզացիայի անհրաժեշտության մասին, կմնան իրենց տաք աթոռներում՝ ողջ ու առողջ: Մենք գտնում ենք, որ նրանց պետք է մոբիլիզացնել և ուղարկել Ուկրաինա, թող զոհվեն իրենց հիվանդ ֆանտազիաների համար, և ոչ թե հասարակ տղաներին ուղարկեն»,- ասվում է հայտարարության մեջ։
Շարժումը կոչ է անում քաղաքցիներին սեպտեմբերի 21-ին ժամը 19։00-ին դուրս գալ «Ոչ մոբիլիղազիային» կարգախոսով համառուսաստանյան բողոքի ակցիայի՝ բոլոր քաղաքների կենտրոններ։ Նրանք նաև խոստացել են հայտարարել Մոսկվայում և Սանկտ Պետերբուրգում ակցիա կազմակերպման վայրերը, իսկ շրջաններում ինքնուրույն ընտրել հարթակներն ու հայտնել այդ մասին։
Բացի այդ, Change.org կայքում մեկնարկած Ռուսաստանում մոբիլիզացիայի դեմ ստորագրահավաքը տասնյակ հազարավոր մարդկանց կողմից աջակցություն է գտել։ Լուրը հրապարակելուց մի քանի րոպե անց այն հավաքել է գրեթե 70 հազար ստորագրություն։ Այժմ այդ թիվը շուրջ 180 հազար է։
Հիշեցնենք, որ ՌԴ նախագահ Վլադիմիր Պուտինը երկրում մասնակի մոբիլիզացիա է հայտարարել։
Էմմա Չոբանյան
