18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
Իսրայելը 2018թ․ ի վեր առաջին դեսպանին է նշանակել Թուրքիայում
Քաղաքականություն
20.09.2022 | 19:56
Իսրայելը նախօրեին նշանակել է Թուրքիայում իր առաջին դեսպանին՝ 2018 թվականից ի վեր, քանի որ երկու երկրներն աշխատում են կարգավորել հարաբերությունները տասնամյա լարվածությունից հետո, գրում են թուրքական լրատվամիջոցները։
Ավագ դիվանագետ Իրիտ Լիլիանը, որն առանցքային դերակատարում է ունեցել Թուրքիա-Իսրայել մերձեցման հարցում, նշանակվել է Թուրքիայում դեսպան։
Լիլիանն Անկարայում Իսրայելի գործերի ժամանակավոր հավատարմատարն էր անցյալ տարվա փետրվարից, երբ երկու երկրները փորձնական քայլեր էին ձեռնարկում՝ հարաբերությունները շտկելու և լիարժեք դիվանագիտական հարաբերությունները վերականգնելու համար:
Հավելենք, որ տարածաշրջանային երկու տերությունները դեսպաններին արտաքսել էին 2018 թվականին, իսկ անցյալ ամիս հայտարարեցին, որ կվերականգնեն դիվանագիտական հարաբերություններն ու կվերանշանակեն դեսպաններին հարաբերությունների աստիճանական բարելավումից հետո:
Իսրայելի նախագահ Իցհակ Հերցոգը դեռևս մարտին այցելել էր Թուրքիա՝ սկիզբ դնելով հարաբերությունների բարելավմանը։ Թուրքիայի արտգործնախարար Մևլութ Չավուշօղլուն էլ մայիսին այցելել էր Իսրայել։
Ըստ մամուլի տեղեկությունների՝ Իսրայելի վարչապետ Յաիր Լապիդը Նյու Յորքում ՄԱԿ-ի Գլխավոր վեհաժողովի շրջանակում հանդիպելու է Թուրքիայի նախագահ Ռեջեփ Թայիփ Էրդողանին։
Էմմա Չոբանյան
