18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
Իրանում զանգվածային բողոքի ցույցեր են
Քաղաքականություն
19.09.2022 | 19:39
Իրանում զանգվածային բողոքի ցույցեր են սկսվել 22-ամյա Մահսա Ամինիի հուղարկավորությունից հետո։ Ենթադրվում է, որ նրան ծեծի են ենթարկել ոստիկանական բաժանմունքում՝ «սխալ» հիջաբ կրելու համար:
Ամինիի հուղարկավորությունը տեղի է ունեցել Քուրդիստան նահանգում։ Դրանից հետո տեղի բնակիչները դուրս են եկել փողոց և հանրահավաքներ սկսել՝ պահանջելով մանրամասն հետաքննություն։ Ամբոխը եկել է նահանգապետի գրասենյակ, որտեղ նրանց ցրել են արցունքաբեր գազով, հայտնում է Al Jazeera-ն։
Բողոքի ակցիաները սկսվել են այն պատճառով, որ պաշտոնական աղբյուրները երիտասարդ աղջկա մահվան պատճառ են նշել սրտի հետ կապված խնդիրները։ Սակայն տեղի իրավապաշտպանները հայտնել են, որ Ամինին հոսպիտալացվել է ականջներից արյունահոսությամբ և գանգի կոտրվածքով։
Հարկ է նշել, որ Մահսա Ամինին Թեհրան էր գնացել հարազատներին տեսակցելու։ Այնտեղ նրան բերման է ենթարկել շարիաթի ոստիկանությունը՝ հատուկ ջոկատը, որը վերահսկում է կրոնական նորմերի պահպանումը։ Նրան մեղադրել են հիջաբը ոչ պատշաճ կրելու մեջ և տարել ոստիկանական բաժանմունք։ Մի քանի ժամ այնտեղ մնալուց հետո Ամինին հոսպիտալացվել է և հիվանդանոցում մահացել։
Մինչ բողոքի ցույցերը շարունակվում են՝ Իրանի ոստիկանության պետը հերքել է մեղադրանքները, թե «ոչ պատշաճ հիջաբ» կրելու համար ձերբակալված աղջիկը մահացել է ծեծի ենթարկվելու պատճառով։
Տաթև Ֆռանգյան
