Ասում են` ռուսը որ գնաց, դո՞ւք եք պահելու սահմանը. այդքան ստրկամիտ մի´ եղեք. Գագիկ Գինոսյան. ՏԵՍԱՆՅՈՒԹ

«Ազգային գերակա շահը պետք է լինի հայի կռվանը: Ասում են` ռուսը որ գնաց, դու՞ք եք պահելու սահմանը. այդքան ստրկամիտ մի´ եղեք, ոչ ոք մեզ չի պահելու, իսկ ով էլ կանգնի մեր կողքին, կկանգնի այն ժամանակ, երբ մեր ճակատագրին տեր կանգնելու վճռականություն կունենանք: Քանի դեռ պետք է ծնկաչոք աղերսենք, որ մեզ պահեն, ավելի են ցած նետելու»,- Factor TV-ի հետ զրույցում նման տեսակետ է հայտնում «Կարին» ավանդական երգի-պարի խմբի գեղարվեստական ղեկավար Գագիկ Գինոսյանը` անդրադառնալով Հայաստանի կողմից վարվող արտաքին քաղաքականությանը:

Հարցին, որ եթե Ռուսաստանն ու ՀԱՊԿ-ն են մեր դաշնակիցը, այդ դեպքում ինչու ենք մենք միայնակ, Գագիկ Գինոսյանը պատասխանում է. «Վարդենիսից Արտանիշ, Վերին Շորժայից մինչև Գորիս և Կապան ոչ մի տեղ ռուսական հետք չենք տեսնում. երբ սկսում ենք աղերսել, որ մեզ պահեն, հետևանքը սա է: Ու՞ր է մեր դաշնակիցը, ինչու՞ է ռուսական ռազմաբազան անտերության մատնված, չտեսանք, որ որևէ տեղ ռուսական զորքը որևէ հարձակում կասեցներ»:

Անդրադառնալով ներքին քաղաքական կյանքին` Գագիկ Գինոսյանը շեշտում է` հերյուրանք տարածելուց զատ ո´չ իշխանությունից, ո´չ ընդդիմությունից գաղափարական որևէ ելույթ չի լսել և ավելացնում, որ «ինքնիշխանություն» բառը մեր չորս ղեկավարներից որևէ մեկից չի լսել: Մեր զրուցակիցը խոսում է Հայաստանի համար վճռորոշ այս պահին մտավորականության դերի մասին. «Ունենք մտավորականների պակաս, որոնք գործողության դիմելու վճռականություն կունենան: Մտավորականության առաջնային խնդիրը պետք է լինի ցույց տալ, որ իրար հանդեպ «թարախ շնչող» իշխանական և ընդդիմադիր թևերի մեջտեղում կա ազգ: Մտավորականությունը պետք է գտնի կենտրոնաձիգ գաղափար և դրա շուրջ համախմբի հասարակությանը»:

Մանրամասները` տեսանյութում:

Աննա Բաբաջանյան