16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Նենսի Փելոսին Երևան գալուց հետո առաջին գրառումն է արել՝ ՀՀ-ն հիշատակելով իբրև ավտորիտարիզմից պաշտպանության կարիք ունեցող ժողովրդավարական պետություն
Քաղաքականություն
17.09.2022 | 22:05
Հայաստան ժամանելուց մեկ ժամ անց ԱՄՆ Ներկայացուցիչների տան խոսնակ Նենսի Փելոսին առաջին գրառումն է կատարել «Թվիթերում»։
Հայաստանը թվարկելով Թայվանի և Ուկրաինայի կողքին՝ իբրև ավտորիտար ռեժիմներից պաշտպանության կարիք ունեցող ժողովրդավարական պետություններից մեկը․ Փելոսիի թվիթում նշվում է․
«Մեր [ԱՄՆ] հիմնադիր հայրերը 1787 թվականին՝ Սահմանադրության օրը, նախընտրեցին ժողովրդավարությունը ավտորիտարիզմից: Սերնդեսերունդ մենք պաշտպանել ենք այդ ընտրությունը:
Այսօր ԱՄՆ-ից մինչև Ուկրաինա, Թայվան և Հայաստան, աշխարհը կանգնած է ժողովրդավարության և ավտորիտարիզմի միջև ընտրության առաջ, և մենք պետք է նորից ընտրենք ժողովրդավարությունը»,- գրել է քիչ առաջ Երևան ժամանած Ներկայացուցիչների տան խոսնակը։
Հիշեցնենք` ԱՄՆ-ն այսօր Ռուսաստանի լայնածավալ զինված հարձակմանը ենթարկված Ուկրաինային ամենից շատ զենք մատակարարող պետությունն է։ Ամիսներ առաջ Նենսի Փելոսին, չնայած Չինաստանի իշխանությունների սպառնալիքներին, այցելել էր Թայվան, որը գտնվում է չինական հարձակման վտանգի ներքո։ Այդպիսով՝ ԱՄՆ-ի բարձրաստիճան պաշտոնյաներից մեկը հանդիսացող Փելոսին ցույց էր տվել իր երկրի աջակցությունն այդ երկրին։
Նենսի Փելոսին ԱՄՆ-ի ներկայիս նախագահ, դեմոկրատ Ջո Բայդենի հետ միասին մեծ ջանքեր է գործադրել Հայոց Ցեղասպանության ճանաչման գործում։
Ռոբերտ Անանյան
