Դուք եք նոր Հայաստանի ճարտարապետները, մաղթում եմ ձեզ, որ այդ գործում հաջողեք՝ որպես իրավագիտակից և հպարտ քաղաքացիներ. ԿԳ նախարարի ուղերձը

ՀՀ ԿԳ նախարար Արայիկ Հարությունյանը Փարիզից ֆեյսբուքյան ուղիղ հեռարձակմամբ դիմել է օրվա շահառուներին՝ շրջանավարտներին, մաղթելով ուրախ և անփորձանք օր: Նաև ԿԳՆ կայքում տեղադրվել է նախարարի շնորհավորական ուղերձը, որ ներկայացնում ենք ստորև.

Սիրելի´ շրջանավարտներ, սրտանց շնորհավորում եմ ձեզ դպրոցական «Վերջին դասի» կապակցությամբ: 

Դպրոցին հրաժեշտ տալու և կյանքի նոր փուլ մտնելու հիշարժան այս իրադարձությունը համընկել է Հայաստանի և նրա հասարակության համար անչափ կարևոր իրադարձությունների հետ, որի ականատեսն ու ակտիվ մասնակիցն եք եղել դուք վերջին ամիսներին: Խորհրդանշական է, որ Հայաստանի Հանրապետությունն էլ իր կենսագրության նոր փուլն է սկսում հիմա՝ հարստացած նոր լիցքերով և փոփոխությունների մեծ սպասումով: 

Մասնագիտության և զբաղմունքների ընտրությունը, անկասկած, ձեր կյանքի կարևոր որոշումներից է լինելու: Ցանկանում եմ, որ տարիներ անց էլ գոհ լինեք կատարած ընտրությամբ, ձեր գիտելիքներն ու կարողությունները ծառայեցնենք արդար հասարակության կայացմանը:

Սակայն այս պահին, մասնագիտությունից էլ առավել, ես կարևորում եմ լավ քաղաքացի լինելու և դառնալու ճանապարհը: Դպրոցի խնդիրը միայն գիտելիք փոխանցելը չէ: Լավն է այն կրթությունը, որ պատրաստում է զարգացած, քննադատական մտածողությամբ, սեփական իրավունքները գիտակցող և դրանք պաշտպանող քաղաքացիներ: 

Դուք եք նոր Հայաստանի ճարտարապետները: Մաղթում եմ ձեզ, որ այդ գործում հաջողեք՝ որպես իրավագիտակից և հպարտ քաղաքացիներ: