Թղթի նախագիծ չկա սեղանին դրված․ Նիկոլ Փաշինյան․ ՏԵՍԱՆՅՈւԹ

Նիկոլ Փաշինյանը քիչ առաջ ուղիղ եթերում խոսեց ԱԺ-ում իր այսօրվա աղմկահարույց ելույթի մասին։ ՀՀ վարչապետի այս ելույթից հետո համացանցում տարաբնույթ մեկնաբանություններ հայտնվեցին, թե իբր փաստաթուղթ է ստորագրվել կամ ստորագրվելու:

«Էս պահին դրությամբ ոչ մի թուղթ չեմ ստորագրել, թղթի նախագիծ չկա սեղանին դրված, առաջիկա օրերի համար էլ էդպիսի բան նախատեսված չէ։ Էս պահին որեւէ թուղթ չկա»,-ասաց Փաշինյանը։

Վարչապետ կոչ արեց մանիպուլյացիաների չտրվել․ «Սա արվում է հատուկ, որպեսզի սահմանին կանգնած մեր զինվորների դիմադրողականությունը թուլացնեն»։

«Իմ այսօրվա ասածը նշանակում է հետևյալը, որ մենք խաղաղության օրակարգ ենք որդեգրել, և դրա իրականացումը միայն մի կողմից չէ կախված՝ դա կախված է մի քանի կողմերից, որոնք դեր ունեն այս պրոցեսում։ Այս մասին ֆեյսբուքյան ուղիղ եթերի ժամանակ հայտարարել է վարչապետ Նիկոլ Փաշինյանը։

«Հայաստանը պատրաստ է խաղաղության օրակարգով առաջ շարժվել։ Մենք հրապարակային ասել ենք մեր դիրքորոշումները։ Խաղաղության պայմանագրի համար Ադրբեջանը ասել է կետեր, մենք ասել ենք, որ այդ կետերում մեզ համար անընդունելի ոչինչ չկա, բայց դրանք ամբողջական չեն և լրացրել ենք Ադրբեջանի կողմից ներկայացված օրակարգը, որը ներառում է նաև Լեռնային Ղարաբաղի ժողովրդի իրավունքները և սրանից բխող կարգավիճակը»,- նշեց Փաշինյանը։

«Մենք երբեք այնպիսի թուղթ չենք ստորագրի, որ ՀՀ տարածքային ամբողջականությունը կդնի կասկածի տակ»,- ընդգծեց վարչապետը։

Մանրամասները՝ տեսանյութում։