Միակողմանի փաստաթուղթ է. Մարուքյանի ելույթը Շոտլանդիայի խորհրդարանում` ԼՂ խնդրի առնչությամբ

«Բրիտանական ԱԳՆ-ի հրավերով՝ քաղաքական առաջնորդների ծրագրով, գտնվում եմ Մեծ Բրիտանիայում, որտեղ տարատեսակ հանդիպումներ եմ ունենում կառավարության անդամների, խորհրդարանի, քաղաքացիական հասարակության, ակադեմիական շրջանակների և քաղաքական ուժերի ներկայացուցիչների հետ»,- ֆեյսբուքյան իր էջում գրել է «Ելք» դաշինքի անդամ Էդմոն Մարուքյանը։

Ինչպես տեղեկացրել է Մարուքյանը, այցի շրջանակներում այսօր Շոտլանդիայի մայրաքաղաք Էդինբուրգում՝ շոտլանդական խորհրդարանում, նա հանդիպել է Շոտլանդիայի կառավարության արտաքին հարաբերությունների և Եվրոպայի հարցերով նախարար Ալասդաիր Ալլանին (Minister for Europe and International Dr. Alasdair Allan the Scottish government), որին ներկայացրել է մեր մտահոգությունն առ այն, որ շոտլանդական խորհրդարանում արդեն երկրորդ տարին է՝ Խոջալուի դեպքերի վերաբերյալ 24, իսկ հետո՝ 25-ամյակը նշող բանաձև է շրջանառվում, որում անաչառ կերպով արտացոլված չէ Արցախյան հակամարտության խնդրի էությունը. միակողմանի և իրականությանը չհամապատասխանող տեղեկություններով փաստաթուղթ է։

Նրա խոսքով՝ նախարարը հավաստիացրել է, որ նման բանաձևերի նախագծերը որևէ կերպ չեն արտացոլում Շոտլանդիայի կառավարության տեսակետները, և շոտլանդական օրենսդրության համաձայն՝ յուրաքանչյուր պատգամավոր կարող է նմանատիպ նախագծով հանդես գալ, որն անգամ քննարկման չի դրվում։

«Ես ներկայացրեցի նաև, որ Ադրբեջանը նմանատիպ տեղեկությունները «վաճառում» է իր բնակչության վրա՝ ներքին օգտագործման համար, և առաջարկեցի համագործակցություն՝ ՀՀ ԱԺ Հայաստան-Մեծ Բրիտանիա խորհրդարանական բարեկամական խմբի շրջանակներում, որի արդյունքում կկարողանանք հայկական հարցերի վերաբերյալ տեղեկատվական բացը լրացնել և կանխել ադրբեջանական միակողմանի և իրականությանը չհամապատասխանող նախաձեռնությունները»,- գրել է Էդմոն Մարուքյանը։