Ըստ ՀԱՊԿ անդամ Ղազախստանի՝ «դժվար է խոսել հայ-ադրբեջանական սահմանի խախտման մասին»

Հայ-ադրբեջանական սահմանին իրավիճակի սրման ֆոնին Ղազախստանից Հայաստան հնարավոր խաղաղապահներ ուղարկելու հարց դրված չէ, իսկ «ՀՀ պետական սահմանի խախտման մասին դժվար է խոսել». լրագրողների հետ զրույցում ասել է Ղազախստանի փոխվարչապետ-արտաքին գործերի նախարար Մուխթար Թլեուբերդին, փոխանցում է ՏԱՍՍ-ը։

«Հարցն այդպես դրված չի։ Երեկ ՀԱՊԿ Անվտանգության խորհրդի արտահերթի նիստին վարչապետ Նիկոլ Փաշինյանը տեղեկացրեց ՀԱՊԿ անդամ երկրների ղեկավարներին Ադրբեջանի ու Հայաստանի սահմանին իրավիճակի մասին։ Ընդհանուր առմամբ տեղեկությունը հասկանալի է։ Իհարկե, մենք կցանկանայինք օբյեկտիվ տեղեկություն ստանալ, քանի որ երկու կողմից տարբեր տեղեկություններ են ստացվում։  Ուստի, ընդհանուր առմամբ, պետությունների ղեկավարները որոշել են, որ ՀԱՊԿ գլխավոր քարտուղարը պետք է այցելի տեղանք, տեղում ստանա ամբողջական տեսլականը, ապա տեղեկացնի պետությունների ղեկավարներին»,- գերատեսչության ղեկավարի խոսքերն է մեջբերում Vlast առցանց հրատարակությունը։

Նախարարը նաև հայտարարել է, որ Ադրբեջանի և Հայաստանի միջև սահմանը սահմանազատված չէ, և այդ պատճառով «դժվար է խոսել սահմանի որևէ խախտման մասին»։ Ըստ Թլեյբերդիի, առաջնային խնդիրն է վերսկսել հայ-ադրբեջանական սահմանի սահմանագծման և սահմանազատման համատեղ հանձնաժողովի աշխատանքը։

«Մենք պատրաստ ենք կիսվել մեր փորձով: Քանի որ մենք սահմանազատել ենք մեր սահմանը ցամաքային և նույնիսկ ծովային սահմանի ողջ պարագծով, սահմանազատումը գրեթե ավարտված է բոլոր պետությունների հետ, բացի Ռուսաստանից: Ռուսաստանի հետ սահմանազատումը մեզնից հավանաբար կխլի ևս 2-3 տարի»,- պարզաբանել  է արտաքին գերատեսչության ղեկավարը։

Տաթև Ֆռանգյան