30.04.2026 | 15:10
ՀՀ-ն հետընթաց է ապրել մամուլի ազատության ինդեքսում // Փաշինյանը՝ գերիների վերադարձի մասին․ ԼՈՒՐԵՐ
«ՊՆ բունկերում խորհրդակցություն չի եղել»․ ՊՆ խոսնակ
Հասարակություն
13.09.2022 | 00:02
Պաշտպանության նախարարությունը հերքում է համացանցային լրատվամիջոցներից մեկի տարածած այն տեղեկությունը, թե ռազմական գերատեսչության բունկերում երեք ժամից ավելի խորհրդակցություն է տեղի ունեցել և քննարկվել Ադրբեջանի հնարավոր հարձակումը ՀՀ-ի վրա։
«Խորհրդակցություններ պարբերաբար լինում են: Լրատվամիջոցի հիշատակած ձևաչափով, բովանդակությամբ ու տևողությամբ խորհրդակցություն այսօր չի եղել»,- ասաց ՊՆ խոսնակ Արամ Թորոսյանը։
Հարցին՝ հայ-ադրբեջանական սահմանին նկատվո՞ւմ է թշնամու զորքերի կուտակում և Հայաստանի Զինված ուժերն արդյո՞ք գործողություններ է իրականացնում, ինչպես մամուլում է հրապարակված, Արամ Թորոսյանը պատասխանեց․ «Զինված ուժերը աչալրջորեն իրականացնում են պետական սահմանի պահպանությունը»։ Հիշեցնենք՝ սեպտեմբերի 12-ի առավոտյան հատուկ հանձնարարություններով դեսպան Էդմոն Մարուքյանը ֆեյսբուքյան գրառմամաբ նշել էր, որ ադրբեջանական կողմը հող է նախապատրաստում հարձակման համար։
«Երբ Ադրբեջանը պլանավորում է հերթական սահմանային սադրանքը, դա իրականացնելուց առաջ կազմակերպում է այդ սադրանքի տեղեկատվական լեգիտիմացման կեղծ հենքը: Միջազգային հանրության բոլոր դերակատարները, ովքեր հետաքրքրված են հայ-ադրբեջանական խաղաղության գործընթացով և Լեռնային Ղարաբաղի հակամարտության կարգավորմամբ, պետք է շատ ուշադիր հետևեն և հստակ գիտակցեն, որ հերթական անգամ Ադրբեջանը սադրանքի նախապատրաստական գործընթաց է սկսել»,- գրել էր Մարուքյանը։
Սեպտեմբերի 12-ի առավոտյան Արցախի Կարմիր շուկա և Թաղավարդ համայնքների ուղղությամբ հակառակորդը կրակել էր տարբեր տեսակի և տրամաչափի հրաձգային զենքերից։ Կրակահերթերը տևել էին շուրջ 30 րոպե։ Գնդակներից մեկը խոցել է բնակելի տան երկրորդ հարկի պատշգամբի դուռը և թափանցել սենյակ, ևս մեկ գնդակ դիպել էր տան բակում գտնվող շվաքարանին։ 4 հոգանոց ընտանիքից որևէ մեկը չէր տուժել։ Թաղավարդում ևս բնակելի տուն է վնասվել, իսկ հարևան տան բակում հայտնաբերվել էր խոշոր տրամաչափի գնդացրի գնդակ։
Նարեկ Կիրակոսյան
