Ռուբեն Հախվերդյանը «եվրոպական մակարդակի երևույթ է»․ Տիգրան Խզմալյան

Երևանի քաղաքապետի պաշտոնում Ռուբեն Հախվերդյանի առաջադրմամբ նպատակ կա ցույց տալու, թե ինչպիսին պետք է լինի մայրաքաղաքի առաջնորդը․ Factor.am-ի հետ զրույցում երգիչ, երգահան Ռուբեն Հախվերդյանի առաջադրումն այսպես մեկնաբանեց Հայաստանի Եվրոպական կուսակցության նախագահ Տիգրան Խզմալյանը։

«Թեև այդ մասին խոսելը հիմա ժամանակավրեպ է, բայց այս քայլով ուզում եմ մարդկանց հիշեցնել, թե ինչի հետ գործ ունենք։ Սա Երևանն է, որն ունի բազմադարյա մշակութային քաղաքակրթություն»,- նշեց Խզմալյանը։

Նրա բնորոշմամբ՝ Ռուբեն Հախվերդյանը «եվրոպական մակարդակի երևույթ է», և  ըստ Խզմալյանի՝ բնական է, որ Եվրոպական կուսակցությունը քաղաքապետի ընտրությունների մրցավազքում ժողովրդին իրական արժեքները ցույց տալու նպատակ է հետապնդում։ Թե ինչպես են գնահատում իրենց կուսակցության և իրենց թեկնածուի շանսերը, Տիգրան Խզմալյանն ասաց՝ այդ հարցի պատասխանը պետք է տա քաղաքացին։

«Մեր գործն է առաջարկել, ներկայացնել և հիշեցնել՝ ով ով է։ Եթե կրկին դրսից եկած կեղտոտ փողով քսակ ենք ընտրելու, ուրեմն մենք ստամոքսով ենք մտածում»,– հավելեց Խզմալյանը՝ նկատելով նաև, որ Ռուբեն Հախվերդյանին ճիշտ չենք գնահատում։ Հախվերդյանը Խզմալյանի ղեկավարած ուժի ցուցակով մասնակցել էր նաև 2021-ի արտահերթ խորհրդարանական ընտրություններին։ Կուսակցությունը, սակայն, անցողիկ շեմը չէր հաղթահարել։ Ռուբեն Հախվերդյանի հետ կապ հաստատել չհաջողվեց, նա մեր զանգերին չպատասխանեց։

Ավելի վաղ քաղաքական ուժերից «Քաղաքացիական պայմանագիրը» հայտարարել էր, որ քաղաքապետի իրենց թեկնածուն կուսակցության անդամ, նախկին փոխվարչապետ Տիգրան Ավինյանն է։

Ընտրություններին մասնակցելու մտադրության մասին է հայտնել նաև Տիգրան Արզաքանցյանի կինը՝ «Ուժը հայրենյաց» կուսակցության անդամ Նատալյա Ռոտենբերգը։ Այլ ուժերից դեռ հստակ հայտարարություններ չկան։