Էրդողանը դժգոհել է, որ Հունաստանը Թուրքիայի սպառնալիքների պատճառով դիմել է ՄԱԿ-ին, ԵՄ-ին և ՆԱՏՕ-ին

Թուրքիայի նախագահ Ռեջեփ Թայիփ Էրդողանը Բալկանյան երկրներից վերադառնալիս լրագրողների հետ զրույցում կրկին անդրադարձել է Հունաստանին և սպառնալիքներ հնչեցրել։

Թուրքական լրատվամիջոցների հաղորդմամբ՝ Էրդողանը նշել է, որ Հունաստանի կողմից «խախտումներ են կատարվել Էգեյան ծովում, ոտնձգություններ կան թուրքական ինքնաթիռների նկատմամբ», որոնցից մի քանիսը ՆԱՏՕ-ի առաքելություններ են կատարել, կան ներխուժող գործողություններ՝ ընդհուպ մինչև C-300 համակարգերով։

«Երբևէ որևէ բան լսե՞լ եք Հունաստանի С-300-ների մասին նրանցից, որոնք խոսում էին մեր С-400-ի միջադեպի մասին: C-300-ները նույնպես ռուսական են։ Ձայն չկա։ Նրանք շարունակում են կղզիները ռազմականացնել մեր քթի տակ։ Միաժամանակ, իհարկե, կա բազաների ստեղծում։ Ամերիկան ​​է առաջնորդում սա»,- հայտարարել է Էրդողանը։

Թուրքիայի նախագահի խոսքով՝ եթե ՄԱԿ-ի Գլխավոր վեհաժողովի շրջանակում հնարավորություն լինի հանդիպել ԱՄՆ նախագահին, այդ քայլերը քննարկվելու են։

Էրդողանը նաև դժգոհել է, որ Հունաստանն իր գործընկերներին Թուրքիայի սպառնալիքների շուրջ բողոքներ է ներկայացրել։

«Անմիջապես Թուրքիայի հետ խոսելու փոխարեն՝ նրանք գրեթե սպառնալիքի մեխանիզմներ են կիրառում՝ անընդհատ բողոքելով մեզանից ՄԱԿ-ում, Ամերիկայի Միացյալ Նահանգներում, Եվրամիությունում և նույնիսկ ՆԱՏՕ-ում, որի ամենաուժեղ անդամներից ենք: Իհարկե, դա հաճելի չէ։ Ինչ լեզու էլ նրանք հասկանան, փակագծերը կբացենք ու կխոսենք այդ լեզվով»,- ասել է Թուրքիայի նախագահը։

Հիշեցնենք, որ Հունաստանի կառավարությունը դիմել էր ՆԱՏՕ-ի ու ԵՄ-ի գործընկերներին, ինչպես նաև ՄԱԿ-ի ղեկավարին՝ խնդրելով դատապարտել Թուրքիայի պաշտոնյաների ավելի ու ավելի ագրեսիվ հայտարարությունները և ենթադրություն հայտնել, որ ներկայիս երկկողմ լարվածությունը կարող է վերածվել երկրորդ բաց հակամարտության եվրոպական հողի վրա:

Ավելի վաղ Էրդողանը հայտարարել էր, որ Աթենքին Թուրքիայի պատասխանը կարող է տրվել «ցանկացած գիշեր»։

Նա նաև Աթենքին կոչ էր արել հիշել պատմությունն ու դասեր քաղել Զմյուռնիայում ժամանակին տեղի ունեցածից։

«Մենք միայն մի բառ ունենք ասելու Հունաստանին՝ մի՛ մոռացեք Իզմիրը (Զմյուռնիա)»,- ասել էր Էրդողանը՝ հիշեցնելով 1922-ին տեղի ունեցած Զմյուռնիայի աղետը՝ տեղի հույն և հայ բնակչության կոտորածը թուրքական զորքերի կողմից։

Էմմա Չոբանյան