«Լոնդոնի կամուրջը փլուզվել է». Մեծ Բրիտանիայում թագուհու մահվանից հետո գործի է դրվել գաղտնի օպերացիան

Մեծ Բրիտանիայում գործի է դրվել «Լոնդոնի կամուրջ» օպերացիան: Սա թագուհի Եղիսաբեթ II-ի մահվան դեպքում գաղտնի ծրագիր է։ Այն մշակվել է կես դար առաջ և մի քանի անգամ թարմացվել, գրում է Sky news-ը։

Ծրագիրն ամենայն մանրամասնությամբ կարգավորում է բրիտանական կառավարության, մայրաքաղաքային ոստիկանության, Անգլիկան եկեղեցու և լրատվամիջոցների գործողությունները թագուհու մահվան դեպքում։ Այն նախատեսում է, որ բրիտանական միապետի անձնական քարտուղարն առաջինն իմանա նրա մահվան մասին, իսկ հետո կապ հաստատի վարչապետի հետ, որին ասվում է «Լոնդոնի կամուրջը փլուզվել է» գաղտնի ծածկագիրը: Ամենայն հավանականությամբ, ամեն ինչ հենց այդպես էլ եղել է, քանի որ թագուհու մասին առաջին պաշտոնական հայտարարությունն արել է վարչապետ Լիզ Թրասը։

Այնուհետև, պլանի համաձայն, Մեծ Բրիտանիայի ԱԳ նախարարության գլոբալ արձագանքման կենտրոնից թագուհու մահվան լուրը հասցվում է Բրիտանիայից դուրս գտնվող բոլոր 14 երկրների կառավարություններին, որոնցում պետության ղեկավարն էր Եղիսաբեթ Երկրորդը։

Ծրագրի համաձայն՝ Բուքինգեմյան պալատի գրեթե բոլոր աշխատողները տուն են ուղարկվում: Իսկ թագավորական ընտանիքի պաշտոնական կայքում սև ֆոնի վրա սգո ուղերձ է տեղադրված։ Պարտադիր կարգով բոլոր պետական գերատեսչությունները հատուկ պաստառներ են տեղադրում իրենց ինտերնետային էջերում, այդ թվում՝ սոցիալական ցանցերում։ Դրոշները խոնարհվում են։

Լրատվամիջոցները չեղարկում են ժամանցային հաղորդումները, BBC-ի հաղորդավարներից պահանջվում է եթեր դուրս գալ սև հագուստով։

Թագուհու մարմինը պետք է բերվի Բուքինգեմյան պալատ, ապա դագաղը կտեղափոխվի մեկ այլ՝ Վեսթմինսթերյան պալատ, իսկ մահից ինը օր անց Վեսթմինսթերյան աբբայությունում տեղի կունենա հուղարկավորության արարողություն։ Միապետին կհուղարկավորեն Վինձոր ամրոցի Սուրբ Գեորգի մատուռում։

Տաթև Ֆռանգյան