Մենք Հայաստանի տարածքով որևէ մեկին միջանցք չենք տալու. Փաշինյան․ ՏԵՍԱՆՅՈՒԹ

«Ճանապարհների բացումը ոչ մի սպառնալիք Հայաստանի ու Սյունիքի մարզի համար չի ստեղծում. ընդհակառակը, ճանապարհի բացումը կբերի կայունության և անվտանգության լրացուցիչ երաշխիքներ»,- այս մասին այսօր Վլադիվոստոկում հայ համայնքի հետ հանդիպման ժամանակ հշեց ՀՀ վարչապետ Նիկոլ Փաշինյանը:

«Այլ բան, որ ադրբեջանական խոսույթի մեջ երբեմն մտնում են արտահայտություններ, որոնք բացահայտում են որոշակի վտանգներ: Օրինակ՝ խոսվում է միջանցքի մասին: Ես ուզում եմ շատ հստակ լինի, որ ՀՀ տարածքով մենք որևէ միջանցք որևէ մեկին չենք տալու: Բայց մենք ճանապարհ տալու ենք և բացելու ենք, պատրաստ ենք դա անել ցանկացած պահի:
Մենք նաև առաջարկներ ենք փոխանցել, որ պահին Ադրբեջանն այդ առաջարկներն ընդունի, արդեն կարելի է դրանց հիման վրա կոնկրետ փաստաթուղթ ստորագրել և շատ արագ իրագործել այդ պայմանավորվածությունը: Դա ոչ մի սպառնալիք չի ստեղծում․
Հավաստիացնում եմ՝ ճանապարհի բացումը ոչ միայն սպառնալիք չէ, այլ նաև օգտակար է Հայաստանի համար, Ադրբեջանի ու Թուրքիայի համար էլ է օգտակար:

Ադրբեջանի ուզածն այն է, որ տարածաշրջանի կոմունիկացիաները բացվեն այնպես, որ Հայաստանը շարունակի մնալ շրջափակման մեջ: Այ դա սպառնալիք է»,- նշեց Փաշինյանը:

ՀՀ վարչապետը նաև հայտարարեց, որ կոմունիկացիաների բացում ասելով Հայաստանը հասկանում է, որ Հայաստանն Ադրբեջանի տարածքով երկաթուղային կապ է ստանում Ռուսաստանի հետ և ավտոմոբիլային կապ Ադրբեջանի տարածքով ՌԴ-ի հետ. «Այսօր ՀՀ ամբողջ տնտեսությունը Վերին Լարսի ճանապարհից է կախված․․․

Առավել ևս հիմա, որ Ուկրաինայի շուրջ ստեղծված իրավիճակով պայմանավորված Սև ծովով բեռնափոխադրումների մի մասը ևս տեղափոխվել է և անցնում է Վերին Լարսով․․․ Այս առումով ուզում եմ արձանագրել, որ օրինակ ես շտ կուզեմ, որ այդ ճանապարհները բացվեն, և դա անհնար չեմ համարում»։

Մանրամասները՝ տեսանյութում։