ՌԴ-ում լրագրողների բնակարանները խուզարկում են․ բերման ենթարկվածների մեջ է նաև Բելլա Նասիբյանը

Սեպտեմբերի 8-ին զանգվածային խուզարկություններ են իրականացվել ռուսական լրատվամիջոցների մի շարք աշխատակիցների բնակարաններում։ Ըստ Meduza-ի՝ լրագրողների մեծամասնության դեպքում խուզարկությունները կարող են կապված լինել «ռուսական բանակի մասին ֆեյքերի» քրեական գործի հետ, որով անցնում է ՌԴ Պետդումայի նախկին պատգամավոր Իլյա Պոնոմարյովը։

Եկատերինբուրգի «Վեչերնիե վեդոմոստի» թերթի գլխավոր խմբագիր Վլադիսլավ Պոստնիկովի բնակարանում հետաքննչական միջոցառումներ են իրականացվել, որից հետո, ըստ փաստաբան Գեորգի Կրասնովի, ինքն է եկել իրավապահների մոտ։

Տյումենում անվտանգության ուժերը գնացել են լրագրող Յուլիա Գլազովայի՝ Tyumen-Pro պորտալի նախկին խմբագրի և «Ազատ Եվրոպա/Ազատություն» ռադիոկայանի սիբիրյան մասնաճյուղի անկախ թղթակցի բնակարան: Kavkazsky Knot-ի հաղորդմամբ՝ լրագրող Բելլա Նասիբյանն էլ խուզարկությունից հետո բերման է ենթարկվել Դոնի Ռոստովում, իսկ մինչ այդ նա հայտնաբերել է, որ իր բանկային հաշիվներն արգելափակված են։

Օռլովի շրջանի Բակլանովո գյուղում անվտանգության ուժերը եկել են խուզարկելու ակտիվիստ և բլոգեր Սերգեյ Նոսովի տունը, հայտնում է Orlets Telegram ալիքը։

Մոսկվայում անվտանգության ուժերը խուզարկել են լուսանկարիչ Ռուսլան Սուխուշինի տունը, OVD-Info իրավապաշտպան պորտալին ասել է նրա կինը՝ Իրինան։

Փաստաբան Գեորգի Կրասնովը պարզաբանել է, որ Վլադիսլավ Պոստնիկովը հարցաքննվում է ՆԳՆ գլխավոր վարչության ծայրահեղականության դեմ պայքարի տարածաշրջանային կենտրոնում (կենտրոն «Ե»)՝ Պետդումայի նախկին պատգամավոր Իլյա Պոնոմարյովի գործով։

Նախկին պատգամավորի նկատմամբ ՌԴ ԶՈւ-ի դեմ «կեղծ լուրեր» տարածելու հոդվածով գործ է հարուցվել, հեռակա խափանման միջոց է ընտրվել կալանավորումը։ 2014 թվականին նա Ռուսաստանից մեկնել է Ուկրաինա՝ այն բանից հետո, երբ նրա դեմ մեկ այլ գործ է հարուցվել՝ «յուրացումների» մասին։ Կիևի իշխանությունները նրան տվել են ժամանակավոր կեցության թույլտվություն, իսկ ավելի ուշ՝ Ուկրաինայի քաղաքացիություն։

Տաթև Ֆռանգյան