15.12.2025 | 16:00
Մթնոլորտային օդում փոշու սահմանային թույլատրելի կոնցենտրացիան գերազանցվել է Կենտրոնում, Արաբկիրում, Շենգավիթում և Նոր Նորքում
ԵՄ-ում նշել են, թե երբ Վրաստանը կդառնա անդամակցության թեկնածու երկիր
Քաղաքականություն
08.09.2022 | 14:09
Վրաստանի և Եվրամիության ներկայացուցիչները քննարկել են հարաբերությունների նոր մակարդակի հասնելու հարցը։ Եվրամիությունը Վրաստանից ակնկալում է դատական բարեփոխումներ, օրենքի գերակայություն և լրատվամիջոցների ազատություն։ Թբիլիսին խոստանում է կատարել բոլոր պայմանները, գրում է DW-ն։
«Եվրամիություն-Վրաստան Ասոցացման խորհրդի յոթերորդ նիստն առաջինն էր Եվրամիության և Վրաստանի միջև հարաբերությունների նոր փուլում՝ նրան «եվրոպական հեռանկար» տալուց հետո, մինչդեռ Մոլդովան և Ուկրաինան արդեն ստացել են ԵՄ անդամակցության թեկնածուների կարգավիճակ»,- գրում է պարբերականը։
Հանդիպման ընթացքում եվրոպական կողմը նշել է, որ դեպի Եվրամիություն հաջողությամբ շարժվելու համար Թբիլիսին պետք է ավելի շատ ջանքեր գործադրի դատական համակարգի բարեփոխումների, օրենքի գերակայության և լրատվամիջոցների ազատության ոլորտում։ ԵՄ դիվանագիտության ղեկավար Ժոզեպ Բորելը նաև ընդգծել է, որ երկիրը պետք է ազգային կոնսենսուս ունենա Եվրամիությանն անդամակցելու հարցում։
Բորելն ընդգծել է ԵՄ-ի հավատարմությունը Վրաստանի տարածքային ամբողջականությանը և նրան հատուկ աջակցություն է խոստացել կիբերանվտանգության և ապատեղեկատվության դեմ պայքարում։
Իր հերթին, Վրաստանի վարչապետ Իրակլի Ղարիբաշվիլին մամուլի ասուլիսում վստահեցրել է, որ իր կառավարությունը հավատարիմ է ԵՄ բոլոր չափանիշներին համապատասխանելուն և լիովին պատրաստ է աշխատել բոլոր քաղաքական կուսակցությունների և քաղաքացիական հասարակության հետ։
Հիշեցնենք, որ Եվրահանձնաժողովը որոշել է գնահատել Վրաստանի կողմից իրականացվող բարեփոխումները՝ այս տարվա դեկտեմբերի փոխարեն 2023 թվականին ԵՄ անդամակցության թեկնածուի կարգավիճակ շնորհելու համար։
Տաթև Ֆռանգյան
