Զապորոժիեի ԱԷԿ-ը կրկին գնդակոծվել է․ տեղի բնակչությանը յոդի հաբեր են բաժանում՝ ճառագայթման արտահոսքի դեպքում պաշտպանվելու համար

Ուկրաինայի Զապորոժիեի ատոմակայանի տարածքի գնդակոծությունները վերսկսվել են, և պատերազմող կողմերը կրկին միմյանց մեղադրել են դրանց համար։ Ռուսական զորքերը հրթիռային և հրետանային հարվածներ են հասցրել Նիկոպոլ քաղաքին, որը գտնվում է Եվրոպայի ամենամեծ ատոմակայանից Դնեպր գետի հակառակ ափին, հայտնել է Դնեպրոպետրովսկի մարզի ղեկավար Վալենտին Ռեզնիչենկոն, գրում է VOA-ի ռուսական ծառայությունը։

«Ատոմակայաններում հրդեհներ են, էլեկտրաէներգիայի անջատումներ և այլն, որոնք ստիպում են մեզ նախապատրաստել տեղի բնակչությանը միջուկային վթարի հետևանքներին»,- ասել է Ռեզնիչենկոն:

Վերջին օրերին իշխանությունները յոդի հաբեր են բաժանում տեղի բնակիչներին՝ ճառագայթման արտահոսքի դեպքում նրանց պաշտպանելու համար:

Ուկրաինայի Էներգոդարի քաղաքապետ Դմիտրի Օռլովը, որտեղ գտնվում է ատոմակայանը, հայտնել է, որ չորեքշաբթի քաղաքը երկրորդ անգամ հայտնվել է ռուսական հարձակման տակ և մնացել առանց էլեկտրականության։

«Հանրային կոմունալ և այլ ծառայությունների աշխատակիցները պարզապես ժամանակ չունեն ավարտելու վթարային և վերականգնողական աշխատանքները, երբ հաջորդ գնդակոծությունը նրանց աշխատանքը հասցնի զրոյի»,- ասել է նա Telegram-ում:

Ռուսական կողմը մեղադրել է Ուկրաինային։

Սրա հետ մեկտեղ, ՌԻԱ Նովոստին, հղում անելով Էներգոդարի ռուսական ադմինիստրացիայի ղեկավար Ալեքսանդր Վոլգային, հայտնում է, որ Զապորոժիեի ԱԷԿ-ի հինգերորդ էներգաբլոկը կանգնեցվել է։ Նրա խոսքով՝ արտադրված էներգիան չի կարող մտնել ընդհանուր համակարգ էլեկտրահաղորդման գծերի վնասման պատճառով։

«Որոշում է կայացվել դադարեցնել հինգերորդ էներգաբլոկի շահագործումը, իսկ վեցերորդ էներգաբլոկն այս պահին աշխատում է մասնակի ռեժիմով»,- ասել է Վոլգան։

Այսօր հատուկ հանձնաժողովը կորոշի էլեկտրահաղորդման գծերի վերանորոգումից հետո ամբողջ կայանի շահագործման հետագա ռեժիմը, ինչին խանգարում են մշտական գնդակոծությունները։

Տաթև Ֆռանգյան