17.12.2025 | 21:49
Լավրովն ու Արաղչին քննարկել են Հյուսիս-Հարավի համար ռազմավարական Ռեշտ-Աստարա երկաթուղու շինարարությունը
ԱՄՆ-ն արձագանքել է Հունաստանի հասցեին Էրդողանի հնչեցրած սպառնալիքներին
Քաղաքականություն
07.09.2022 | 16:08
ԱՄՆ-ն արձագանքել է Հունաստանի հասցեին Թուրքիայի նախագահ Ռեջեփ Թայիփ Էրդողանի հնչեցրած սպառնալիքներին, գրում է Greek City Times-ը։
Մասնավորապես, ԱՄՆ-ն «ոչ օգտակար» է անվանել Էրդողանի նախազգուշացումները Հունաստանին ծովային վեճերի վերաբերյալ և հորդորել ՆԱՏՕ-ի երկու դաշնակիցներին՝ դիվանագիտական ճանապարհով կարգավորել տարաձայնությունները:
«Այն ժամանակ, երբ Ռուսաստանը կրկին ներխուժել է ինքնիշխան եվրոպական պետություն, հայտարարությունները, որ կարող են բարձրացնել լարվածությունը ՆԱՏՕ-ի դաշնակիցների միջև, ոչ օգտակար են։ ԱՄՆ-ը շարունակում է խրախուսել ՆԱՏՕ-ի մեր դաշնակիցներին միասին աշխատել՝ տարածաշրջանում խաղաղությունն ու անվտանգությունը պահպանելու և տարաձայնությունները դիվանագիտական ճանապարհով լուծելու համար»,- ասել է ԱՄՆ Պետքարտուղարության խոսնակը։
Հավելենք, որ Էրդողանը նախօրեին կրկին սպառնացել էր Հունաստանին․
«Հունաստանը կզղիներում ռազմաբազաներ է տեղակայել։ Եթե Թուրքիայի հասցեին սպառնալիքները շարունակվեն, ապա Անկարայի համբերությունը կարող է հատել։ Իմ զգուշացումները Հունաստանին ինչ-որ մտացածին հայտարարություններ չեն։ Թուրքիայի պատասխանը կարող է հետևել ցանկացած պահի, ցանկացած գիշեր»,- ասել էր նա։
Օրերս էլ Էրդողանն Աթենքին կոչ էր արել հիշել պատմությունն ու դասեր քաղել Իզմիրում ժամնակին տեղի ունեցածից։
«Մենք միայն մի բառ ունենք ասելու Հունաստանին՝ մի՛ մոռացեք Իզմիրը (Զմյուռնիան)»,- ասել էր Էրդողանը՝ հիշեցնելով 1922-ին տեղի ունեցած Զմյուռնիայի աղետը՝ տեղի հույն և հայ բնակչության կոտորածը թուրքական զորքերի կողմից։
Էմմա Չոբանյան
