16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Ճանապարհները պետք է գործեն այն երկրների ամբողջական ինքնիշխանության ներքո, որով անցնում են․ Փաշինյանը՝ ապաշրջափակման մասին․ ՏԵՍԱՆՅՈՒԹ
Քաղաքականություն
07.09.2022 | 13:48
ՀՀ վարչապետ Նիկոլ Փաշինյանը Արևելյան տնտեսական ֆորումում ունեցած ելույթում անդրադարձել է նաև տարածաշրջանային հաղորդակցությունների ապաշրջափակմանը։ Նա նշել է, որ 2020 թվականի նոյեմբերի 9-ի հայտարարության մեջ խոսվում է տարածաշրջանում բոլոր տնտեսական և տրանսպորտային ենթակառուցվածքների ապաշրջափակման մասին։
«Այնուհետև մենք Մոսկվայում հունվարին ստորագրեցինք եռակողմ հայտարարություն աշխատանքային խմբի ստեղծման մասին՝ երկրների փոխվարչապետների գլխավորությամբ, որոնք զբաղվում են մեր տարածաշրջանում հաղորդակցությունների բացման հարցով։ Այդ ծրագրի միտքը նրանում է, որ Հայաստանը տրանսպորտային ուղիներ է ստանալու Ադրբեջանի տարածքով, Ադրբեջանն էլ տրանսպորտային ուղիներ կստանա Հայաստանի տարածքով»,- ասել է Փաշինյանը։
Գլոբալ առումով, ըստ նրա, սա հնարավորություն է՝ բացել նոր միջազգային առևտրային ուղիներ։ Փաշինյանի խոսքով՝ Հայաստանը շահագրգռված է դրանում և հույս ունի մոտ ապագայում լուծել այդ խնդիրը։ Նա նշել է, որ աշխատանքներում կա առաջընթաց, սակայն բոլոր հարցերը դեռ լուծված չեն։
«Քանի որ պետք է իրավաբանական հարցերը լուծել, թե ինչ իրավաբանական կարգավորմամբ են աշխատելու այդ ճանապարհները։ Դիրքորոշումը հստակ է, որ բացվող ճանապարհները պետք է գործեն այն երկրների ամբողջական ինքնիշխանության ներքո, որով անցնում են։ Մենք հուսով ենք, որ այդ սկզբունքով կկարողանանք իրագործել այդ ծրագիրը, որը մենք, ի դեպ, անվանում ենք Հայկական խաչմերուկ ծրագիր։ Ես կարծում եմ՝ այս ծրագիրը կարևոր է ոչ միայն տարածաշրջանի երկրների՝ Հայաստանի, Իրանի, Ադրբեջանի, Վրաստանի, Թուրքիայի համար, այլև Ռուսաստանի, Հեռավոր Արևելքի, նաև՝ Մերձավոր Արևելքի»,- նշել է ՀՀ վարչապետը։
Էմմա Չոբանյան
