Քաղաքականություն
06.09.2022 | 13:54
Ադրբեջանի և Ռուսաստանի ռազմատեխնիկական համագործակցությունը զարգանում է բազմաթիվ ոլորտներում։ Բաքուն պարբերաբար դիմում է Մոսկվային զինատեսակների մատակարարման հարցով։ Այս մասին ՏԱՍՍ-ին հայտնել են ՌԴ Ռազմատեխնիկական համագործակցության դաշնային ծառայության մամուլի ծառայությունից՝ Բաքվում անցկացվող ADEX 2022 միջազգային պաշտպանական ցուցահանդեսի շրջանակում։
«Ադրբեջանի հետ ռազմատեխնիկական համագործակցությունը զարգանում է բազմաթիվ ուղղություններով։ Բաքվի կարիքներին համապատասխան՝ պարբերաբար դիմումներ են ստացվում»,- ասել են մամուլի ծառայությունից։
Նշվել է նաև, որ ներկայում ռազմածովային տեխնիկան բանակցությունների օրակարգում չէ, սակայն Ռուսաստանն «այդ ոլորտում գործընկերներին առաջարկելու բան ունի»։
Հիշեցնենք, որ Բաքվում սեպտեմբերի 6-8-ն անցկացվում է ADEX 2022 պաշտպանական IV միջազգային ցուցահանդեսը, որին մասնակցում են 208 ընկերություններ, այդ թվում՝ Թուրքիայից, Բուլղարիայից, Իտալիայից, Չինաստանից, Ֆրանսիայից, Նիդեռլանդներից և առաջին անգամ՝ Հորդանանից։ Ռուսաստանը ևս մասնակցում է ցուցահանդեսին։ Նախատեսվում է շուրջ 500 միավոր տեխնիկա ցուցադրել։
Էմմա Չոբանյան
