09.10.2026 | 18:34
Պուտինը, Փաշինյանն ու Ալիևը Թուրքմենստանում 15 րոպեանոց չծրագրված հանդիպում են անցկացրել
Lufthansa-ի օդաչուները պատրաստվում են հերթական գործադուլին
Քաղաքականություն
06.09.2022 | 14:37
Գերմանական Lufthansa ավիաընկերության օդաչուները պատրաստվում են հերթական գործադուլին՝ աշխատանքային պայմանների բարելավման և աշխատավարձերի բարձրացման բանակցություններում առաջընթացի բացակայության պատճառով, գրում է DW-ի ռուսական ծառայությունը։
«Չնայած հակառակ պնդումներին՝ Lufthansa-ն դեռ չի կապվել մեզ հետ և չի ներկայացրել նոր առաջարկ։ Բանակցությունների ևս մեկ փուլ կկայանա երեքշաբթի»,- հայտնել է Vereinigung Cockpit (VC) օդաչուների արհմիությունների միավորումը։
VC-ի ներկայացուցիչը հավելել է, որ Lufthansa-ն կարող է կանխել չորեքշաբթի նախատեսված երկօրյա գործադուլը, եթե «լուրջ առաջարկ» անի:
Անցյալ ուրբաթ՝ սեպտեմբերի 2-ին, Lufthansa-ի օդաչուներն արդեն մեկօրյա գործադուլ էին կազմակերպել, ինչը հանգեցրել է Գերմանիայից ավելի քան 800 չվերթի չեղարկման, ինչից տուժել է մոտ 130․000 ուղևոր: Ըստ Lufthansa-ի՝ ակցիայի արդյունքում ընկերությունը 32 մլն եվրոյի վնաս է կրել։
Արհմիությունները պահանջում են 5,5 տոկոսով բարձրացնել 5000 օդանավի հրամանատարների և առաջին օդաչուների աշխատավարձերն արդեն այս տարի և դրա ավտոմատ կապը գնաճի հետ:
Lufthansa-ն այս պահանջներն անվանել է չափազանցված՝ նշելով, որ եթե դրանք կատարվեն, ընկերության ծախսերն աշխատավարձերի և անձնակազմի համար առաջիկա երկու տարում կավելանան ավելի քան 40 տոկոսով կամ 900 միլիոն եվրոյով: Ընկերությունում ընդգծել են, որ սա բացարձակապես անընդունելի է։
Տաթև Ֆռանգյան
