05.11.2026 | 11:58
63-ից 72 տարեկան քաղաքացիների տնտեսական ներուժի ծրագիր կիրականացվի. 400 մլն դրամ հատկացվեց․ ՏԵՍԱՆՅՈՒԹ
Ղազախստանը շարունակում է Ադրբեջանի հետ բանակցությունները նավթի փոխադրման տարբերակների շուրջ
Քաղաքականություն
05.09.2022 | 23:06
Ղազախստանի նավթագազային «Կազմունայգազ» ընկերությունը շարունակում է բանակցությունները Ադրբեջանի պետական նավթային SOCAR ընկերության հետ նավթի տարանցման տարբերակների շուրջ։ Այս մասին Ինտերֆաքսի ղազախական ծառայությանը հայտնել են երկրի Էներգետիկայի նախարարությունից։
«Ղազախստանի նավթի արտահանման ուղիների հետագա դիվերսիֆիկացման և Անդրկասպյան միջազգային տրանսպորտային երթուղու զարգացման շրջանակում Էներգետիկայի նախարարությունը և KMG-ն բանակցություններ են սկսել ադրբեջանական կողմի հետ՝ Ադրբեջանի տարածքով ղազախական նավթի տարանցման շուրջ»,- ասել են նախարարությունից։
Գերատեսչության ներկայացուցչի խոսքով՝ ներկայում KMG-ն շարունակում է բանակցություններն ադրբեջանական ընկերության ու ղազախական նավթային ընկերությունների հետ նավթի փոխադրման տարբերակների շուրջ։
Ավելի վաղ էլ Ղազախստանի էներգետիկայի նախարար Բոլատ Աքչուլակովը հայտարարել էր, որ դիտարկվում է Ադրբեջանով ոչ մեծ քանակությամբ նավթի փոխադրման հնարավորությունը։
«Ադրբեջան Կասպից ծովով որոշ ծավալի նավթի փոխադրումը տեխնիկական հարց է, խոսքը հսկայական ծավալների մասին չէ, այլ ավելցուկների, որոնք կարող ենք ունենալ»,- ասել էր նախարարը։
Հիշեցնենք, որ ավելի վաղ Reuters-ը հայտնել էր, որ ակնկալվում է, որ Ղազախստանը սեպտեմբերից իր հում նավթը սկսելու է վաճառել Ադրբեջանի ամենամեծ խողովակաշարով, քանի որ այլընտրանքներ է փնտրում երթուղուն, որը ՌԴ-ն սպառնում է փակել։
Խնդրի մանրամասներին տիրապետող աղբյուրը լրատվամիջոցին հայտնել էր, որ Ղազախստանի պետական նավթային «Կազմունայգազը» ադրբեջանական պետական SOCAR ընկերության առևտրային ստորաբաժանման հետ ակտիվ քննարկումներ է անում՝ թույլ տալու ադրբեջանական նավթամուղով տարեկան 1,5 միլիոն տոննա ղազախական նավթ արտահանել դեպի Թուրքիայի միջերկրածովյան Ջեյհան նավահանգիստ։
Էմմա Չոբանյան
