09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Վանի Աղթամար կղզու Սուրբ Խաչ հայկական եկեղեցում 10-րդ պատարագն է մատուցվել․ ԼՈՒՍԱՆԿԱՐՆԵՐ
Քաղաքականություն
05.09.2022 | 13:18
Վանա լճի Աղթամար կղզու Սուրբ Խաչ հայկական եկեղեցում, 2010 թվականի վերաբացումից ի վեր, նախօրեին 10-րդ պատարագն է մատուցվել, հայտնում են թուրքական լրատվամիջոցները։
Նշվում է, որ Պոլսի Հայոց պատրիարք Սահակ Մաշալյանն ու քահանա Հարություն Դամաթյանը ժամանել են կղզի՝ հոգևորականների հետ արարողությունն անցկացնելու։ Պատարագին մասնակցել են 46 հոգևորականներ պատրիարքարանից, այցելուներ Ստամբուլից, Հայաստանից ու այլ երկրներից։
Պոլսի Հայոց պատրիարքն իր ելույթում անդրադարձել է Հայաստանի և Թուրքիայի միջև հարաբերությունների կարգավորման երկխոսության գործընթացին։
«Այսօր մենք աղոթեցինք, որ երկու բարեկամ ժողովուրդներն ապրեն խաղաղության մեջ, Կովկասը վերածվի խաղաղության հողի»,- ասել է Մաշալյանը։
Հիշեցնենք, որ 2005 թվականին Թուրքիայի Մշակույթի և զբոսաշրջության նախարարությունը սկսել էր Վանի Աղթամար կղզու Սուրբ Խաչ եկեղեցու վերականգնման աշխատանքները։ 2007-ին էլ եկեղեցին այցելուների համար բացվել էր որպես թանգարան: 2010 թվականից ի վեր ամեն տարվա սեպտեմբերին՝ Խաչվերացի տոնին հաջորդող կիրակի օրը, Սուրբ Խաչ եկեղեցում պատարագ է մատուցվում: Այս տարվա պատարագը թվով 10-րդն էր։
Էմմա Չոբանյան
