06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Հերոսից՝ մեղադրյալ. ի՞նչ հանցանք է վերագրվում 44-օրյա պատերազմում ՊԲ-ն ղեկավարած Ջալալ Հարությունյանին. ՏԵՍԱՆՅՈՒԹ
Քաղաքականություն
02.09.2022 | 20:51
44-օրյա պատերազմի ժամանակ Արցախի Պաշտպանության բանակի հրամանատարի պաշտոնը զբաղեցրած Ջալալ Հարությունյանին մեղադրանք է առաջադրվել։ Գեներալ-լեյտենանտը կասկածվում է ծառայության նկատմամբ անփույթ վերաբերմունքի մեջ, նրա նկատմամբ որպես խափանման միջոց է ընտրվել բացակայելու արգելքը և պաշտոնավարման կասեցումը:
Ըստ իրավապահ կառույցի՝ Ջալալ Հարությունյանի գործողությունների հետևանքով հայկական ստորաբաժանումները կրել են մեծաքանակ մարդկային ուժի և զինտեխնիկայի կորուստներ, ռեզերվային ստորաբաժանումները դարձել են անմարտունակ, զբաղեցրած կրակային դիրքերն անցել են հակառակորդի հսկողության տակ։ ՀՀ Քննչական կոմիտեից հայտնում են, որ Ջալալ Հարությունյանը 2020 թվականի հոկտեմբերի 6-ին որոշում է կայացրել հակառակորդին հասցնել բանակային հակահարված, սակայն դրա պլանավորման և իրականացման ընթացքում անտեսել է մարտական կանոնադրության հարձակողական գործողություններին ներկայացվող՝ հակառակորդին 1:3 հարաբերակցությամբ գերազանցելու պահանջը։
«Զորամասի շարասյան գլխամասն ուժերի շուրջ 50 տոկոսով նոր միայն հասել է խնդրի կատարման մեկնարկային բնագիծ, որի պայմաններում N զորամասը հրաձգային գումարտակի մի մասի հետ հասել է գրեթե խնդրի կատարման բնագիծ և մարտի բռնվել հակառակորդի հետ՝ չունենալով աջակցություն աջ կողմից ու թիկունքից և կրել տանկերի, ՀՄՄ-ների և կենդանի ուժի մեծաքանակ կորուստներ, տևական մարտերից հետո հայտնվել է հարձակման անցած հակառակորդի կողմից շրջափակման ենթարկվելու վտանգի առջև և հարկադրված նահանջ է կատարել, իսկ մյուս զորամասը առաջ շարժվելով և մինչ Պիրախմեդլի-Դորտչինար կոչվող շրջան հասնելը հակառակորդի խմբավորման հանդիպելուց և ոչնչացնելուց հետո առաջխաղացում չի ունեցել՝ տանկային գումարտակի տեղ չհասնելու պատճառով, մինչդեռ երկու զորամասերը խնդրի կատարումը պետք է մեկնարկեին զուգահեռ և միաժամանակ»,- ասվում է հաղորդագրությունում։
Մեկ այլ դրվագով էլ, ըստ Քննչական կոմիտեի, Ջալալ Հարությունյանի գործողությունների հետևանքով հակառակորդը ստացել է տարածքային և ռազմավարական առավելություն, իսկ հոկտեմբերի 13-ին հակառակորդի դիվերսիոն խումբն առանց խոչընդոտների հասել և վերահսկողության տակ է վերցրել N զորամասի մշտական տեղակայման վայրը:
Ջալալ Հարությունյանն Արցախյան երկրորդ պատերազմի ժամանակ վիրավորվել էր, և 2020 թվականի հոկտեմբերի 27-ին Պաշտպանության բանակի հրամանատար էր նշանակվել Միքայել Արզումանյանը։ Հաջորդ օրը՝ հոկտեմբերի 28-ին, Հարությունյանին շնորհվել էր Արցախի հերոսի կոչում։
Հիշեցնենք՝ երեկ արդեն երկրորդ մեղադրանքն է առաջադրվել նաև Արցախի նախագահի խորհրդական, պատերազմի վերջին փուլում Պաշտպանության բանակը ղեկավարած Միքայել Արզումանյանին։
Մանրամասները՝ տեսանյութում։
Շողիկ Գալստյան
