Ալիևը հայտարարել է, թե Ադրբեջանը «երբեք չի հարմարվել իր մեծ հարևանների քաղաքականությանը, այլ ունի իր սեփականը»

Ադրբեջանը երբեք չի հարմարվել իր մեծ հարևանների քաղաքականությանը և միշտ ունեցել է իր սեփական քաղաքականությունը։ Այս մասին հայտարարել է Ադրբեջանի նախագահ Իլհամ Ալիևը, գրում են տեղական լրատվամիջոցները։

«Մենք երբեք չենք հարմարվել մեր մեծ հարևանների քաղաքականությանը։ Մենք միշտ ունեցել ենք մեր քաղաքականությունը, որը ձևավորվել է միջազգային իրավունքի, արդարության, միջազգային կազմակերպությունների որոշումների ու փաստաթղթերի, ինչպես նաև իմաստության սկզբունքների հիման վրա։ Այդ պատճառով ես կարծում եմ, որ մենք հաջողակ ենք»,- ասել է Ալիևը Իտալիայում 48-րդ «Cernobbio» միջազգային ֆորումի ժամանակ պատասխանելով հարցերին։

Նա նաև նշել է, որ «Ադրբեջանն ունի կայուն քաղաքական դիրք և կայուն տնտեսություն»։

Բացի այդ, Ալիևը նշել է, որ ուկրաինական պատերազմը մեծապես փոխելու է իրավիճակն աշխարհում։

«Պարզ  է միայն, որ աշխարհը երբեք չի լինի այնպիսին, ինչպիսին փետրվարից առաջ էր։ Աշխարհը փոխվել է, և այդ փոփոխությունների շարժը կախված է հետևյալ գործոններից՝ ինչքա՞ն կտևի պատերազմն Ուկրաինայում, ինչպե՞ս կավարտվի այս պատերազմը, ինչպիսի՞ն կլինի ուժերի հարաբերակցությունը աշխարհում և, իհարկե, տարածաշրջանում»,- ասել է Ալիևը։

Նա հավելել է, որ Բաքվին հետաքրքրում են նոր գլոբալ աշխահակարգի հետևանքները Հարավային Կովկասի համար, տարածաշրջանի հիմնական երկրների դիրքորոշումները՝ Հայաստանի հետ խաղաղության հասնելու հեռանկարների համատեքստում։

«Մենք դիտարկում ենք իրավիճակը։ Իհարկե, մենք գործելու ենք մեր ռազմավարությանը համապատասխան։ Միաժամանակ, չենք կարող անտեսել այն փաստը, որ աշխարհը փոխվում է»,- ասել է Ադրբեջանի նախագահը։

Էմմա Չոբանյան