Թուրքիայի ՊՆ ղեկավարը Հունաստանի գործողություներն անվանել է «թշնամական ու սադրիչ» և սպառնացել անհապաղ պատասխանով

Թուրքիան պատասխանել է ու շարունակելու է անհապաղ պատասխանել Հունաստանի «ագրեսիվ ու սադրիչ գործողություններին», որն անտեսում է իրավունքի ցանկացած նորմ։ Այս մասին հայտարարել է Թուրքիայի ՊՆ ղեկավար Հուլուսի Աքարը Էսքիշեհիր նահանգում գտնվող Թուրքիայի ռազմաօդային ուժերի առաջին ավիաբազայում ելույթ ունենալիս, գրում է «Անադոլու» գործակալությունը։

Նա նշել է, որ Թուրքիան ուշադրությամբ հետևում է տարածաշրջանում հունական կողմի ամեն քայլին։

«Հուլիսի 2-ից սկսած մենք տեղեկացրել ենք ՆԱՏՕ-ի գործընկերներին ու դաշնակիցներին դաշինքի հետ առաքելության մասին՝ Թուրքիայի ռազմաօդային ուժերի ինքնաթիռների մասնակցությամբ։ Ռազմաքաղաքական բլոկի բոլոր երկրները տեղյակ են եղել դաշինքի ծրագրի մասին։ Չնայած դրան՝ հույն զինվորականներն իրականացրել են սադրանք թուրքական F-16-երի նկատմամբ։ Պնդումները, որ հույները չեն իմացել, թե դրանք թուրքական ինքնաթիռներ են, սուտ են»,- ասել է Աքարը։

Նա նշել է, որ, իբր, օգոստոսի 23-ին հունական Հռոդոսում տեղակայված С-300 հակաօդային պաշտպանության համակարգերը թիրախավորել են թուրքական ռազմական ինքնաթիռները՝ դրանով իսկ սպառնալիք ստեղծելով նրանց համար։

Աքարն Աթենքի գործողությունները անվանել է «թշնամական ու սխալ»։

«Հունաստանը փորձում է ամեն ինչ հերքել, այդ թվում՝ ՆԱՏՕ-ի շրջանակում։ Աթենքն արհամարհում է բարիդրացիության ու ընկերության սկզբունքները։ Դա պետք է տեսնեն ինչպես դաշինքում, այնպես էլ նրա սահմաններից դուրս։ Թուրքիան զգուշացրել է ՆԱՏՕ-ի դաշնակիցներին Հունաստանի հարցում։ Հարևան երկրի գործողությունները որևէ ընդհանրություն չունեն  փոխադարձ հարգանք հասկացության հետ»,- ասել է Թուրքիայի պաշտպանության նախարարը։

Նա նաև ընդգծել է, որ բանակը շարունակելու է պաշտպանել Թուրքիայի շահերն ու իրավունքները, ինչպես նաև աջակցել եղբայրական երկրներին, ինչպիսիք են Ադրբեջանը, Լիբիան ու չճանաչված Հյուսիսային Կիպրոսի Թուրքական Հանրապետությունը։

Էմմա Չոբանյան