13.01.2025 | 09:44
Շիրակի մարզում և Թալինի տարածաշրջանում մառախուղ է
Թրամփի տնից առգրավված փաստաթղթերը եղել են գաղտնի․ հետաքննիչներ
Քաղաքականություն
01.09.2022 | 21:58
Փորձագետները կանխատեսում են, որ շուտով մեծ աղմուկ է բարձրանալու Թրամփի տունը խուզարկության ենթարկելու մասին արդարադատության նախարարության վերջին հայտարարությունից հետո, գրում է «Ամերիկայի ձայն»-ը։
ԱՄՆ-ի արդարադատության նախարարությունը հրապարակել է լուսանկարներ, որտեղ երեւում են երկրի նախկին նախագահ Դոնալդ Թրամփի տնից առգրավված գաղտնի փաստաթղթեր:
Ինչպես իրավագիտության պրոֆեսոր Քիմբերլի Ուեյլն է Skype-ի միջոցով ասել «Ամերիկայի Ձայն»-ին, այդ փաստաթղթերի վրա հստակ կերպով երեւում են նարնջագույն կնիքներ, որոնք վկայում են, որ դրանք պարունակում են գաղտնի տեղեկատվություն: Նրա խոսքերով, Թրամփի այն պնդումները, թե ինքն անձամբ է դրանք նախագահության օրոք գաղտնազերծել, չեմ համապատասխանում իրականությանը, քանի որ դրանց վրա չկա «գաղտնազերծված» բառով որեւէ կնիք:
Հետաքննությունների դաշնային բյուրոյի կողմից օգոստոսի 8-ին Ֆլորիդայում Թրամփի տունը խուզարկության ենթարկվեց այն բանից հետո, երբ Թրամփի փաստաբաններից մեկը հայտարարեց, թե բոլոր գաղտնի փաստաթղթերը վերադարձվել են Սպիտակ տուն: Այդպիսով նա արգելել էր, որ այստեղ իրականացվեր խուզարկություն:
Ազգային անվտանգության հարցերով փաստաբան Բրեդլի Մոսն այժմ ասում է, որ այժմ նախապես չհայտարարված այս խուզարկության արդյունքում Թրամփի ու նրա փաստաբանի համար խնդիրները խորանալու են:
«Կարծում եմ, կներկայացվի դիմադրություն ցուցաբերելու, կոծկելու եւ խոչընդոտելու մասին մեղադրանք:
«Ամերիկայի Ձայն»-ին փորձագետն ասել է, թե հնարավոր է համարում Թրամփի դեմ մոտ ժամանակներս քրեական մեղադրանքի առաջադրումը:
Քիմբերլի ՈՒեյլը կարծում է սակայն, որ նախկին նախագահի դեմ նման մեղադրանքներ ներկայացնելու համար հավելյալ տեղեկություններ ու փաստեր են հարկավոր ՀԴԲ-ից եւ Կենտրոնական հետախուզական վարչությունից: Նման գործ սարքելու համար, ասում է նա, կպահանջվեն ամիսներ:
Թրամփը հերքել է իր դեմ հնչող մեղադրանքները, սակայն որեւէ կերպ չի բացատրել, թե ինչու է այդքան մեծ ծավալով գաղտնի փաստաթղթեր հանել Սպիտակ տնից: Նա պարզապես սոցցանցերում գրառումներում հարձակումներ է գործում ընդդեմ արդարադատության նախարարության ու հայտարարում, որ այս ամենի հիմքում քաղաքական դրդապատճառներն են:
Հետաքննիչները հայտարարում են, թե հայտնաբերվել են ապացույցներ այն մասին, որ գրառումները «հավանաբար թաքցվել և հեռացվել են» տան պահեստի տարածքից, ինչն առաջ է բերում կասկածներ, որ «ջանքեր են գործադրվել» հետաքննությունը խոչընդոտելու համար:
