ՄԱԳԱՏԷ-ն պատրաստվում է Զապորոժիեի ԱԷԿ-ում տեսչական ստուգայցի․ մասնագետներն ատոմակայանում երկարաժամկետ ներկայության հույս ունեն

Ատոմային էներգիայի միջազգային գործակալության (ՄԱԳԱՏԷ) տեսուչներն այսօր 3 ժամով պահվել են Ուկրաինայի կողմից վերահսկվող տարածքում՝ Էներգոդար գնալիս, որտեղ գտնվում է Զապորոժիեի ատոմակայանը։ Այս մասին Reuters-ին հայտնել է կազմակերպության ներկայացուցիչը, փոխանցում է DW-ի ռուսական ծառայությունը։

Նշվում է, որ ՄԱԳԱՏԷ-ի ղեկավար Ռաֆայել Գրոսսին վճռական է՝ հինգշաբթի հասնել ատոմակայան, ինչպես և նախատեսված էր։

Ավելի վաղ Ուկրաինայի ՊՆ հետախուզության գլխավոր վարչությունը հայտարարել էր, որ ռուսները, որոնք պատերազմի ժամանակ գրավել են Զապորոժիեի շրջանի զգալի մասը, շարունակում են փորձերը՝ կանխել միջազգային գործակալության տեսուչների այցը։

Նախօրեին առաքելության անդամները, այնուամենայնիվ, ժամանել են Ռուսաստանի կողմից օկուպացված Զապորոժիե քաղաք, որը գտնվում է կայանից մոտ 55 կիլոմետր հեռավորության վրա։ ՄԱԳԱՏԷ-ի անձնակազմը մեկ օր կմնա ԶԱԷԿ-ի տարածքում, օգոստոսի 31-ին հայտարարել էր Զապորոժիեի շրջանի օկուպացիոն վարչակազմի ղեկավար Եվգենի Բալիցկին։

Գործակալության մասնագետներն ավելի երկար մնալու հույս ունեն։

«Եթե մեզ հաջողվի մշտական կամ երկարաժամկետ ներկայություն հաստատել, ապա ժամկետները կերկարացվեն: Բայց այս առաջին փուլը կտևի մի քանի օր»,- լրագրողներին ասել է Գրոսսին:

Տեղական Telegram ալիքները հայտնում են, որ ռուսական զորքերն Ուկրաինային հրթիռակոծության մեջ մեղադրելու համար ամբողջ գիշեր հրետանային կրակ են բացել քաղաքի բնակելի թաղամասերի ուղղությամբ, որտեղ տեղակայված է Զապորոժիեի ԱԷԿ-ը։ Նշվում է, որ ենթակառուցվածքային օբյեկտների, այդ թվում՝ բնակելի շենքերի ուղղությամբ հարվածներ են հասցվել, մի շարք տարածքներում ջրամատակարարում չկա։ Էներգոդարի քաղաքապետ Դմիտրի Օռլովի խոսքով՝ քաղաքի մշտական գնդակոծությունները չեն դադարում առավոտյան ժամը 5-ից։

Տաթև Ֆռանգյան