Բախումների մասին տեղեկություն ունեինք. Ֆիդանյանը` ռուս ակտիվիստներին բերման ենթարկելու մասին․ ՏԵՍԱՆՅՈՒԹ

Անհրաժեշտ էր ՆԳ նախարարության ստեղծումը: Այս մասին այսօր կառավարության նիտից հետո լրագրողների հետ զրույցում նշեց ՀՀ փոխոստիկանապետ Արա Ֆիդանյանը:

«Ոստիկանությունն ապաքաղաքականացված կառույց է, և ՆԳՆ-ի ստեղծումից հետո ևս ոստիկանությունը մնալու է ապաքաղաքականացված կառույց: Իսկ քաղաքական պատասխանատվությունն ընկնելու է ՆԳՆ-ի վրա: Այնտեղ մենք հաշվի ենք առել նույնիսկ ոստիկանապետի նշանակման հետ կապված հարցերը, նրան էլի վարչապետն է նշանակելու, ոչ թե ՆԳ նախարարը: Նաև այլ հանգամանքներ կան, որոնք հնարավորինս ոչ թե կառանձնացնեն Ոստիկանությունը ՆԳՆ-ից, այլ կապահովեն նրա ապաքաղաքական լինելը»,- նշեց Ֆիդանյանը:

Անդրադառնալով հարցին, թե ինչ հիմքով են օրեր առաջ բերման ենթարկել Ազատության  հրապարակում հակապատերազմական խաղաղ բողոքի ակցիա անող ՌԴ քաղաքացիներին, այն դեպքում, երբ նրանք նախապես տեղեկացրել էին ակցիայի մասին, Ֆիդանյանը նշեց. «Զուտ ծանուցումը չի նշանակում, որ որոշակի հավաքների անցկացումը թույլատրելի է կամ հնարավոր է իրականացնել: Նույնիսկ հավաքների ազատության մասին օրենքը հստակ սահմանում է հավաքների ազատության սահմանափակումը: Այնտեղ նշված է, որ եթե առկա են տեղեկություններ կամ հնարավոր է հասարակական կարգի դեմ ուղղված որոշակի գործողություններ… Ոստիկանությունում առկա էին հստակ տեղեկություններ, և արդեն իսկ նշմարվում էր, որ տվյալ տարածքում առկա են նաև այլ տեսակետի տիրապետող անձինք, ինչը նշանակում է, որ այդտեղ չի բացառվում բախումների առկայությունը: Դրանով պայմանավորված՝ որոշում էր կայացվել, որ տվյալ հավաքը հենց այդ պահին պետք է ընդհատվի»,- նշեց Ֆիդանյանը՝ հավելելով, որ ոստիկանությունը ապաքաղաքականացված կառույց է և գործում է օրենքի շրջանակներում:

Հիշեցնենք, որ հուլիսի 24-ին ՌԴ քաղաքացիները Երևանի Ազատության հրապարակում հակապատերազմական ակցիա էին կազմակերպել, որը սակայն չէր կայացել, քանի որ քայլերթը սկսելուց առաջ ոստիկանները մոտեցել էին իրենց ու ասել, որ ակցիան չեղարկվում է և սկսել էին բերման ենթարկել։

Մանրամասները՝ տեսանյութում: