Փոխոստիկանապետը` Վեդիում Թուրքիայի ենթադրյալ քաղաքացիների մասնակցությամբ միջադեպի մասին․ ՏԵՍԱՆՅՈՒԹ

Վեդիում տեղի է ունեցել միջադեպ մի խումբ մարդկանց մասնակցությամբ, պարզաբանումները ներկայումս իրականացվում են, պարզում ենք, թե ով ով է, նույնականացում ենք իրականացնում, որի արդյունքների մասին անպայման կտեղեկացնենք: Այս մասին այսօր կառավարության նիստից հետո լրագրողների հետ ճեպազրույցում նշեց փոխոստիկանապետ Արա Ֆիդանյանը՝ անդրադառնալով շրջանառվող տեղեկությանը, որ Թուրքիայի քաղաքացիների մասնակցությամբ միջադեպ է տեղի ունեցել:

«Ոստիկանությունը տեղեկացվել է, որ տեղի է ունենում միջադեպ, մի խումբ մարդկանց միջև քաշքշուկ է, վիճաբանություն է, որին արձագանքել է ոստիկանությունը»,- նշեց փոխոստիկանապետը:

Դիտարկմանը, որ ականատեսները նշում են, թե բավական երկար ժամանակ ոստիկանները ներկա են եղել և ոչ մի գործողություն չեն արել, փոխոստիկանապետը հորդորեց չվկայակոչել անանուն աղբյուրների: «Բոլոր հանգամանքները կպարզենք և կներկայացնենք: Միջադեպը տեղի է ունեցել ժամեր առաջ»,-ասաց նա:

Անդրադառնալով հարցին, թե արդյոք միջադեպը Թուրքիայի քաղաքացիների մասնակցությամբ է տեղի ունեցել, փոխոստիկանապետը նշեց. «Չեմ կարող այս պահին պատասխանել, քանի որ որոշ երկրների անձնագրերում չի նշվում տվյալ անձի ազգային պատկանելությունը»:

Հարցին, թե մտավախություն չկա՞, որ էլի նույն վիճաբանությունը կշարունակվի նույն մարդկանց միջև, Ֆիդանյանը պատասխանեց. «Մտավախություններ կան, իհարկե, սակայն պետք է առավել համակողմանի միջոցառումներ ձեռնարկվեն: Այսինքն՝ եթե մտավախություն ունենք, այդ մարդիկ անընդմեջ պետք է պահվեն կալանքի տա՞կ: Իհարկե ոչ: Եթե չկան հիմքեր, պետք է ազատ արձակվեն անհապաղ»:

Մանրամասները՝ տեսանյութում: