27.02.2026 | 18:18
Օջալանը նոր ուղերձ է հղել՝ նշելով, որ խաղաղության գործընթացում անհրաժեշտ են օրենքներ
Եվրամիության ԱԳ նախարարները Պրահայում քննարկել են Ռուսաստանի հետ հարաբերությունները
Քաղաքականություն
31.08.2022 | 16:29
Չեխիայի մայրաքաղաք Պրահայում օգոստոսի 31-ին անցկացվում է ԵՄ անդամ պետությունների ԱԳ նախարարների հանդիպումը, որի ընթացքում քննարկվում է Ուկրաինայի պատերազմն ու Ռուսաստանի հետ հարաբերությունները, հայտնում է «Ուկրինֆորմ»-ը։
Մինչ հանդիպման մեկնարկը ԵՄ դիվանագիտության ղեկավար Ժոզեպ Բորելը նշել է դրա երեք հիմնական թեմաները՝ Ռուսաստանի հետ ԵՄ հարաբերությունների քննարկում Ուկրաինայի դեմ պատերազմի համատեքստում, ավելի լայն աջակցություն Ուկրաինային և պատերազմի ազդեցությունը «ամբողջ աշխարհի վրա»։
Մասնավորապես, կքննարկվի ռուսաստանցիների համար վիզաների թեման։ Այս կապակցությամբ Բորելը նշել է, որ «տարբեր անդամ երկրների միջև կան տարբեր տեսակետներ», և խոստացել է աշխատել «միասնական դիրքորոշման» հասնելու ուղղությամբ, քանի որ Եվրոպան չի կարող իրեն թույլ տալ պառակտվել նման կարևոր հարցում։
«Մենք պետք է մտածենք Ռուսաստանի հետ ապագա հարաբերությունների մասին, ինչպես կվարվենք նրա հետ ապագայում այն բանից հետո, ինչ տեղի ունեցավ Ուկրաինայում: Պետք է մտածենք ապագայի մասին: Պուտինյան Ռուսաստանի հետ հարաբերությունները շատ դժվար կլինեն»,- ասել է Բորելը:
Դիվանագետը հիշեցրել է, որ պատերազմը հանգեցրեց «համակարգային էներգետիկ և պարենային ճգնաժամի, որն ամեն օր ավելի ու ավելի է ազդում եվրոպական հասարակությունների վրա», սակայն տուժում են նաև Աֆրիկայի, Ասիայի և Լատինական Ամերիկայի բնակիչները։
Նշենք, որ Պրահայում հանդիպումը ոչ պաշտոնական է, ուստի պաշտոնական որոշումներ սպասել պետք չէ։ ԵՄ նախարարներին կմիանան նաև Ուկրաինայի, Մոլդովայի և Վրաստանի գործընկերները։
Ավելի վաղ ԵՄ նախարարների հանդիպման ժամանակ Գերմանիան և Ֆրանսիան դեմ են արտահայտվել բոլոր ռուսաստանցիների համար վիզային ռեժիմին, նրանց աջակցել է Ավստրիան։
Տաթև Ֆռանգյան
