Գերմանիայում փորձել են հրկիզել ուկրաինացի երեխաների համար նախատեսված մանկապարտեզը

Արևելյան Գերմանիայի Լայպցիգ քաղաքում անհայտ անձինք անցյալ շաբաթվա վերջին փորձել են հրկիզել մանկապարտեզը, ուր հաճախում են Ուկրաինայից փախստականների երեխաներ։ Այս մասին հայտնել է Bild պարբերականը, փոխանցում է DW-ի ռուսական ծառայությունը։

Պարբերականի տվյալներով՝ Գրյունաու շրջանի Entdeckerland մանկապարտեզի մուտքի մոտ հարձակվողներն ալկոհոլի կամ բենզինի նման դյուրավառ հեղուկ են լցրել և այրել այն։ Լուրջ հրդեհ, սակայն, չի առաջացել, բոցից միայն աննշան վնասվել է մուտքի դուռը։ Քանի որ հարձակումը տեղի է ունեցել մանկապարտեզը փակվելուց հետո, տուժածներ չկան։

«Entdeckerland» մանկապարտեզը գտնվում է փախստականների կացարանից 700 մետր հեռավորության վրա, որը ռմբակոծվել է այրվող առարկաներով օգոստոսի 26-ի երեկոյան։ Քանի որ մանկապարտեզն ու մանկատունը միմյանցից ընդամենը ութ րոպե քայլելու հեռավորությամբ են, ոստիկանությունը չի բացառում երկու հարձակումների կապը։

Իրավապահ մարմինները հարցաքննում են վկաներին, ուսումնասիրում տեսախցիկների տեսագրությունները և սոցիալական ցանցերում հրապարակումները՝ փնտրելու հետքեր, որոնք կօգնեն բացահայտել այս հանցագործությունները:

Գրյունաուի հարձակումները համընկել են 30 տարի առաջ Ռոստոկ քաղաքում ռասայական բախումների զոհերի հիշատակի շաբաթվա հետ, ուստի հետաքննությունը չի բացառում քաղաքական դրդապատճառները։

Տաթև Ֆռանգյյան