Որտե՞ղ է լինելու ազատ Եվրոպայի և նեոիմպերիալիստական ինքնավարության բաժանարար գիծը․ Օլաֆ Շոլց

Գերմանիայի կանցլեր Օլաֆ Շոլցը կոչ է արել Եվրամիությունում հիմնավոր բարեփոխումներ իրականացնել՝  նոր անդամների ընդունելու նախապատրաստության համար, գրում է DW-ի ռուսական ծառայությունը։

«Արևմտյան Բալկանների երկրները, Ուկրաինան, Մոլդովան ու հետագայում նաև՝ Վրաստանը պետք է դառնան ԵՄ մաս։ Այս ընդլայնումը Եվրամիության շահերից է բխում»,- հայտարարել է նա՝ ելույթ ունենալով Պրահայի Կառլովի համալսարանում։

«Այս օրերին նորից հարց է առաջանում, թե որտեղ է լինելու ազատ Եվրոպայի և նեոիմպերիալիստական ինքնավարության բաժանարար գիծը», – ասել է Շոլցը։
Դաշնային կանցլերը խոստացել է, որ Գերմանիան կշարունակի օգնել Ուկրաինային պաշտպանվել ռուսական ագրեսիայից և առաջիկա շաբաթներին Ուկրաինա կուղարկի ժամանակակից զինատեսակներ՝ ներառյալ հակաօդային պաշտպանության համակարգեր, ռադարներ և անօդաչու սարքեր։ Շոլցը նաև ասել է, որ Գերմանիան պետք է հատուկ պատասխանատվություն ստանձնի ՀՕՊ-ի և հրետանու ոլորտում Ուկրաինայի ներուժը զարգացնելու համար։
Գերմանիայի կանցլերի խոսքով՝ Եվրամիությունը պետք է կտրուկ քայլեր ձեռնարկի իր ընդլայնման համար և, մասնավորապես, բարեփոխի Եվրախորհրդարանը և արտաքին և հարկային քաղաքականության ոլորտում որոշումների կայացման համակարգը։
Շոլցն առաջարկել է ուժի մեջ թողնել գործող կանոնը, որով ԵՄ անդամ յուրաքանչյուր երկիր  մեկ ներկայացուցիչ է ունենում Եվրահանձնաժողովում, սակայն կողմ է արտահայտվել միաձայն որոշումների կայացման սկզբունքի վերացմանը, նույնիսկ եթե, ըստ նրա, դա հետեւանքներ ունենա նաև Գերմանիայի համար։

Տաթև Ֆռանգյան