15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Պարեկների մասնակցությամբ միջադեպ Գյումրիում․ ոստիկանությունը պարզաբանում է
Հասարակություն
29.08.2022 | 14:49
Գյումրեցի իրավապաշտան Կարապետ Պողոսյանն այսօր ֆեյսբուքյան էջում գրառում էր կատարել` ահազանգելով պարեկների մասնակցությամբ Գյումրիում տեղի ունեցած մի միջադեպի մասին, որին, ըստ նրա, ակամա ականատես է եղել։ Նա, մասնավորապես, գրել է. « Քիչ առաջ պարեկները կանգնեցրել են մի քաղաքացու, պահանջելով փաստաթղթեր, քաղաքացին խնդրել է մի փոքր ժամանակ, որպեսզի զանգի և տանեցիները փաստաթղթերը հասցնեն… Ըստ ինձ դիմած քաղաքացիների՝ պարեկները չեն համաձայնվել տրամադրել ժամանակ, հատուկ միջոց են կիրառել, դեղ լցրել քաղաքացու աչքերին, որից հետո սկսել են դաժանորեն ծեծի ենթարկել… Քաղաքացու ինքնագիտակցությունը կտրուկ վատացել է, տարածքի բնակիչներին նույնիսկ արգելել են ջուր տալ, նշելով, որ իրենց կիրառած դեղի արդյունքում կարող է կուրանալ… Այս պահին եկել է շտապ օգնության բրիգադը․․․»
Ոստիկանության լրատվական ծառայությունից մեզ տեղեկացրեցին, որ հրապարակմանը ծանոթ են, ուսումնասիրում են, իսկ Գյումրի բժշկական կենտրոնի փոխտնօրեն Արմեն Խաչատրյանը փոխանցեց, որ իրենց մոտ ծեծված քաղաքացի չի տեղափոխվել։
Գյումրու շտապօգնության կայանի տնօրեն Արթուր Մանուկյանը մեզ հետ զրույցում պարզաբանեց, որ շտապօգնության բրիգադ ուղարկվել է Գյումրու Սուրեն Մատնիշյան 93 տան հասցե։ Սեփական տան դիմաց կանգնած են եղել թե՛ պարեկները, թե՛ նշված քաղաքացին։ Վերջինս եղել է խիստ նյարդային, հուզված վիճակում, սակայն նրա վրա մարմնական վնասվածք չի եղել, ինքն էլ չի հայտարարել, որ պարեկները ծեծել են։ «Գլխացավ է ունեցել, ճնշումն է բարձր եղել՝ 160, շտապօգնության մեքենայի մեջ են նստեցրել, ներարկրում են արել, առաջարկել են հիվանդանոց տեղափոխել, ինքն իր ձեռքով ստորագրել է, որ հրաժարվում է։ Մեզանից հետաքրքրվում են՝ աչքերին դեղ ցփնած չի՞ եղել, մեր բուժանձնակազմը նման բան չի արձանագրել, հիվանդի կողմից նման հայտարարություն չի էլ հնչել»,-ասաց Արթուր Մանուկյանը։
Արմիկ Մովսիսյան
