16.07.2026 | 01:03
ԱԱ-2026․ Եզրափակիչում՝ Իսպանիա – Արգենտինա․ ՏԵՍԱՆՅՈՒԹ
Ադրբեջանում ԱՄՆ դեսպանատունն արձագանքել է Ադրբեջանի նախագահի օգնականի հայտարարությանը
Քաղաքականություն
29.08.2022 | 11:25
Ադրբեջանում ԱՄՆ դեսպանատունն արձագանքել է Ադրբեջանի նախագահի օգնականի հայտարարությանը։ Հիշեցնենք՝ Հիքմեթ Հաջիևը Շուշիում կազմակերպված միջազգային համաժողովի բացմանն իր ելույթում դժգոհել էր, թե ԱՄՆ դեսպանատունը բացահայտորեն անտեսել է Շուշի այցելելու՝ Ադրբեջանի կառավարության հրավերը։
Դեսպանատան խոսնակն ի պատասխան «Ամերիկայի Ձայն»-ի ադրբեջանական ծառայության հարցմանը հայտարարել է.
«Միացյալ Նահանգները կարծում է, որ շարունակական երկխոսության, շարունակական ներգրավվածության միջոցով, այդ թվում՝ ամենաբարձր մակարդակներում, մենք կարող ենք անել ամեն ինչ՝ օգնելու հասնել կայուն և համապարփակ խաղաղության:
Ամերիկայի Միացյալ Նահանգների դեսպանատան աշխատակիցները շատ անգամ այցելել են և շարունակում են այցելել Ադրբեջանի բոլոր շրջաններ, այդ թվում՝ Աղդամ, Զանգելան և Ֆիզուլի:
Դեսպանատան աշխատակիցներն այցելում են երկրի բոլոր շրջաններ՝ Ադրբեջանի հետ այնպիսի կարևոր հարցերի շուրջ շփումներ հաստատելու համար, ինչպիսիք են անվտանգությունը, առողջապահությունը, էներգետիկան և տնտեսական զարգացումը»,- «Ամերիկայի Ձայնի» ադրբեջանական ծառայության հարցմանն ի պատասխան ասել են դեսպանատնից։
Տաթև Ֆռանգյան
