16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
ԵԱՀԿ գործող նախագահը ՌԴ-ին կոչ է արել անհապաղ դադարեցնել պատերազմն Ուկրաինայի դեմ
Քաղաքականություն
24.08.2022 | 20:54
Ուկրաինայի դեմ փետրվարի 24-ից ՌԴ-ի սանձազերծած պատերազմի 6-րդ ամիսը լրանալու կապակցությամբ ԵԱՀԿ գործող նախագահ, Լեհաստանի արտգործնախարար Զբիգնև Ռաուն այսօր կրկին դիմել է Ռուսաստանին՝ կոչ անելով անհապաղ դադարեցնել բռնությունն ու կանգնեցնել դրա հետևանքով շարունակվող մարդկային տառապանքներն ու կորուստները։ Այս մասին ասված է ԵԱՀԿ պաշտոնական կայքում հրապարակված հաղորդագրությունում։
«Անցած 6 ամիսների ընթացքում առանց դրդապատճառի ՌԴ պատերազմի մեկնարկն ընդդեմ Ուկրաինայի աննկարագրելի ավերածություններ ու տառապանքներ է բերել։ Մենք տեսել ենք, որ հազարավոսր մարդիկ են զոհվել ողջ Ուկրաինայում չտարբերակված հարձակումների արդյունքում»,- հայտարարել է Ռաուն։
«Կարևոր ենթակառուցվածքներին ուղղված ռուսական հարձակումները միլիոնավոր խաղաղ բնակիչների թողել են առանց կենսական ծառայությունների և ռեսուրսների հասանելիության։ Ռուսական ագրեսիան տեղահանել է միլիոնավոր մարդկանց՝ առաջացնելով Երկրորդ համաշխարհային պատերազմից հետո ամենամեծ հումանիտար ճգնաժամը Եվրոպայում։ Հատկապես կանայք և երեխաները ենթարկվում են թրաֆիքինգի ավելի մեծ վտանգի՝ ստիպված լինելով լքել իրենց տները»,- ասել է ԵԱՀԿ նախագահը:
Նա նաև բարձրացրել է, այսպես կոչված, ֆիլտրման գործողությունների հարցը: Ռաուն դատապարտել է համատարած ձերբակալությունները և Ուկրաինայի քաղաքացիների բռնի արտաքսումը Ռուսաստան։
«Ուկրաինայի դեմ պատերազմն անհիմն է և անընդունելի։ Դա միջազգային իրավունքի և սկզբունքների բացահայտ խախտում է, որի վրա հիմնվել է մեր կազմակերպությունը։ Այն պետք է անհապաղ դադարեցվի»,- ասել է ԵԱՀԿ գործող նախագահը:
Տաթև Ֆռանգյան
