Բաքվում ակնկալում են, որ Լոնդոնում Ադրբեջանի դեսպանատան վրա հարձակում իրականացրած անձինք պատասխանատվության կենթարկվեն

Բաքվում ակնկալում են, որ Լոնդոնում Ադրբեջանի դեսպանատան դեմ սադրանքը մանրամասն կհետաքննվի, և այդ սադրանքն իրականացրած անձինք պատասխանատվության կենթարկվեն։ Այս մասին լրագրողներին ասել է Ադրբեջանի ԱԳՆ մամուլի ծառայության ղեկավար Լեյլա Աբդուլաևան, հայտնում են ադրբեջանական լրատվամիջոցները։

Աբդուլաևայի խոսքով՝ Մեծ Բրիտանիայում Ադրբեջանի դեսպանատան վրա հարձակվել են արմատական կրոնական խմբավորման անդամներ, և այս միջադեպը լրջորեն բարձրացնում է դիվանագիտական ներկայացուցչության անվտանգության հարցը։

«Եվս մեկ անգամ հիշեցնում ենք, որ դիվանագիտական ներկայացուցչությունների, այդ թվում՝ դիվանագետների անվտանգությունը պետք է ապահովի ընդունող երկիրը՝ միջազգային պարտավորություններին համապատասխան։ Այս առումով կարևոր է, որ բրիտանացի նախարարը որպես առաջնահերթ խնդիր նշել է դիվանագիտական անձնակազմի անվտանգությունը։ Ինչ վերաբերում է «կարծիքի արտահայտման ազատություն» արտահայտությանը, ապա ազատ հասարակության մեջ այս սկզբունքի կիրառման եղանակները/կանոնները, որոնք կապ չունեն Լոնդոնում մեր դեսպանատան վրա հարձակման հետ, հավանաբար, լավ հայտնի են Բրիտանիայի համապատասխան կառույցներին, որը հին արևմտյան ժողովրդավարություն է։ Հակառակ դեպքում՝ «ազատություն» արտահայտության քողի տակ ցանկացած արմատական և անօրինական գործողությունների մեկնաբանումը կարող է լուրջ խնդիրներ առաջացնել երկրի անվտանգության համար»,- ասել է նա։

Տաթև Ֆռանգյան