25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Թուրքիայի զորքերը դուրս են եկել Սիրիայի հյուսիսում գտնվող ռազմաբազաներից
Քաղաքականություն
11.08.2022 | 21:58
Թուրքական ուժերը դուրս են եկել Հյուսիսային Սիրիայում գտնվող արևմտյան Թալ Աբյադ բնակավայրի երկու բազաներից։ Այս մասին հայտնում է Asharq Al-Awsat-ը՝ վկայակոչելով տարածաշրջանի աղբյուրներին, փոխանցում է «Ահվալ» գործակալությունը։
Նշվում է, որ թուրքական զորքերը դուրս են եկել Հարեքլի և Թաննուզ գյուղերի իրենց ռազմաբազաներից։ Լրատվամիջոցը, վկայակոչելով Մարդու իրավունքների սիրիական դիտորդական կենտրոնին, գրում է, որ զորքերը դուրս են բերվել տարածքից ռուսական ուժերի հետ համակարգված։
Մոսկվայի և Անկարայի միջև չհնչեցված համաձայնությամբ Թալ Աբյադում թուրքական ուժերին, հավանաբար, կփոխարինեն ռուսական և սիրիական կառավարական ուժերը։
Այնուամենայնիվ, Թուրքիայի նախագահ Ռեջեփ Թայիփ Էրդողանը պնդում է, որ Անկարան Սիրիայում առաջիկայում ռազմական գործողություն է իրականացնելու։
«Մենք վճռականորեն շարունակում ենք մեր պայքարն ահաբեկչության դեմ։ Մեր որոշումը՝ ստեղծել հարավային սահմանի երկայնքով 30 կմ-անոց գոտի, մնում է անփոփոխ։ Հուսով եմ՝ առաջիկայում կմաքրենք Սիրիայի վերջին շրջանը, որտեղ թաքնվում է ահաբեկչական կազմակերպությունը (PKK-ն – խմբ․) և կմիավորենք անվտանգության գոտու օղակները»,- ասել էր օրերս Էրդողանը Դեսպանների 13-րդ համաժողովում։
Հիշեցնենք, որ դեռ մայիսին էր Էրդողանը հայտարարել, որ Անկարան պատրաստվում է քրդերի դեմ նոր ռազմական հարձակման։ Հուլիսի 19-ին էլ Թեհրանում տեղի ունեցավ Սիրիայի հարցով Թուրքիայի, ՌԴ-ի և Իրանի նախագահների գագաթնաժողովը, որից հետո Էրդողանը հայտարարեց, որ նրանց աջակցությունն է ակնկալում նոր գործողության հարցում։
Սակայն Թուրքիան միջազգային հավանություն չի ստացել Սիրիայում ռազմական արշավ սկսելու համար։ ԱՄՆ-ը Սիրիայի հյուսիսում գտնվող քրդերին համարում է հիմնական դաշնակիցը ԻԼԻՊ-ի դեմ պատերազմում։ Եվրոպական երկրները նույնպես դեմ են Թուրքիայի ցանկացած նոր ներխուժմանը: Իսկ Ռուսաստանն Անկարան առաջարկում է համագործակցել սիրիական իշխանությունների հետ՝ ռազմական գործողություն սկսելու փոխարեն։
Էմմա Չոբանյան
